Bul týraly Bas prokýratýranyń 1 qyzmet bastyǵynyń orynbasary Eldos Qılymjanov ortalyq kommýnıkasııalar qyzmetinde ótken brıfıngide málim etti.
«12 uıymdasqan qylmystyq toptyń ishinde eń belsendileri – «Dıkıı Arman», «Qazaqstandyqtar» jáne «Aıshýaq-Jantúgel» toptary boldy. Uıymdasqan qylmystyq toptyń 23 múshesi qamaýǵa alyndy», dedi Bas prokýratýra ókili.
Sondaı-aq ol ustalǵandar arasynda qylmys áleminiń 4 bedeldi tulǵasy bar ekenin atap ótti.
«Onyń ishinde 4 qylmys avtorıteti bar. Bul qylmystardy uıymdastyrýshylar men qatysýshylardy anyqtap, jaýapqa tartý úshin barlyq qajetti sharalar qabyldanýda. Búgingi tańda jappaı tártipsizdikti uıymdastyrý jáne qatysý boıynsha 547 adam kúdikti retinde tanylyp, onyń 269-y qamaýǵa alyndy», dedi Eldos Qılymjanov.
Eske salsaq, buǵan deıin QR Premer-Mınıstriniń orynbasary Eraly Toǵjanov qańtar oqıǵasy kezinde qaza bolǵan kúsh qurylymdary qyzmetkerleriniń otbasyna páter beriletinin aıtqan bolatyn.
