Is-sharanyń kún tártibinde ekijaqty qarym-qatynastyń ózekti máseleleri, onyń ishinde azamattyq qoǵamnyń damýy, dinı senim bostandyǵy, Qazaqstandaǵy saıası reformalar, áıelderdiń quqyqtary, bostandyqtary men múmkindikterin keńeıtý qamtyldy. Taraptar sondaı-aq óńirlik jáne kópjaqty formattardaǵy yqpaldastyq máselelerin talqylady.
AQSh Memlekettik hatshysynyń orynbasary Ýzra Zeıa Prezıdent Qasym-Jomart Toqaevtyń Qazaqstannyń qoǵamdyq-saıası júıesin odan ári demokratııalandyrýǵa jáne «Jańa Qazaqstan» qurýǵa baǵyttalǵan saıası reformalaryn qoldaıtynyn jáne AQSh-tyń elimizdegi jańǵyrtý áreketterine meılinshe qolǵabys jasaýǵa daıyn ekenin rastady.
AQSh delegasııasynyń Nur-Sultanǵa sapary sheńberinde amerıkalyq qonaqty Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi qabyldap, eki memleket arasyndaǵy keńeıtilgen strategııalyq seriktestiktiń negizgi máselelerin talqylady.
Otyrystan keıin Ýzra Zeıa men Syrtqy ister mınıstriniń birinshi orynbasary Aqan Rahmetýllın buqaralyq aqparat quraldaryna kezdesýdiń qorytyndysy týraly áńgimelep berdi.
«AQSh Memlekettik hatshysynyń azamattyq qaýipsizdik, demokratııa jáne adam quqyqtary jónindegi orynbasary Ýzra Zeıanyń sapary aıasynda QR Prezıdenti Ákimshiligi Basshysynyń orynbasary – Qazaqstan Prezıdentiniń Halyqaralyq yntymaqtastyq jónindegi arnaıy ókili Erjan Qazyhannyń teń tóraǵalyǵymen Qazaqstan men AQSh arasyndaǵy adam quqyqtary men demokratııalyq reformalar jónindegi joǵary deńgeıdegi dıalogtiń birinshi otyrysy ótti. Bul tetik ekijaqty qarym-qatynasqa qosymsha serpin beredi jáne Qazaqstannyń demokratııalyq kún tártibin ilgeriletýge baǵyttalǵan», dedi A.Rahmetýllın.
Vıse-mınıstrdiń aıtýynsha, is-shara barysynda taraptar BUU-nyń Adam quqyqtary jónindegi keńesindegi yntymaqtastyq, dinı senim bostandyǵy, Qazaqstandaǵy saıası reformalar, halyqtyń áljýaz tobynyń quqyǵyn qorǵaý jáne yqpaldastyrý, adam saýdasyna qarsy is-qımyl máseleleri talqylanǵan. Sonymen qatar áıelderdiń, múmkindigi shekteýli adamdardyń quqyqtary men múmkinshilikterin keńeıtý, qaýipsizdik, quqyq qorǵaý salalaryndaǵy yntymaqtastyq, jemqorlyqpen kúres máseleleri qozǵaldy.
«Prezıdent Qasym-Jomart Toqaev bastamashylyq jasaǵan eldi odan ary demokratııalandyrýǵa, adam quqyqtarynyń saqtalýyn qamtamasyz etýge baǵyttalǵan saıası reformalarǵa basa mán berildi. Amerıkalyq tarap Memleket basshysynyń saıası jáne áleýmettik-ekonomıkalyq salalardaǵy, memlekettik ınstıtýttardaǵy saıasatyn odan ary júzege asyrýǵa qoldaý bildirdi. Qazaqstan men AQSh syndarly yntymaqtastyqty odan ary qoldaýǵa jáne joǵarǵy deńgeıdegi strategııalyq seriktestikti keńeıtýge nıetti», dedi Aqan Rahmetýllın.
AQSh Memlekettik hatshysynyń azamattyq qaýipsizdik, demokratııa jáne adam quqyqtary jónindegi orynbasary Ýzra Zeıa elimizde bolǵan Qańtar qasiretin tergeý barysyna qatysty pikir bildirdi.
«Qazaqstanda bolǵan oqıǵalarǵa qatty alańdadyq. Úkimettiń osy oqıǵalarǵa qatysqandardyń barlyǵyn anyqtap, jaýapqa tartýǵa qatysty búkpesiz jaýabyn qoldaımyz. Biraq, sonymen qatar munyń barlyǵy zańnamaǵa saı bolýǵa tıis. Qazaqstanda adam quqyǵyn ilgeriletýge qoldaý bildiremiz», dedi Ý.Zeıa.
Sondaı-aq ol ekijaqty qarym-qatynastyń 30 jyldyǵy atap ótilip jatqanyn, Qazaqstanmen ózara baılanysty tereńdetýge múddeli ekenimizdi rastady. AQSh tarapy Qasym-Jomart Toqaevtyń 16 naýryzda jarııalaǵan saıası kúntártibin qoldaıtynyn atap ótti.
«Prezıdent bastamalary júzege assa, ol Qazaqstannyń barsha qazaqstandyqtar úshin ádil ári ınklıýzıvti orynǵa aınalýyna kómektesedi. Ortalyq Azııadaǵy turaqtylyq pen órkendeýdi ilgeriletý maqsatymyzda Qazaqstannyń orny erekshe», dediÝzra Zeıa. Sapar aıasynda AQSh delegasııasy Qazaqstandaǵy birqatar basqa da resmı tulǵa jáne azamattyq qoǵam ókilimen kezdesýdi josparlap otyr.
