Infografıkany jasaǵan Amangeldi Qııas, «EQ»
Ortalyq depozıtarııdiń habarlaýynsha, ásirese aqpan aıynda bólshek ınvestorlar sany kúrt artypty (+69 myń shot). Al naýryzda ınvestısııa álemine bilek sybana kirisken ınvestorlardyń arqasynda ashylǵan shottar sany 22 myńnan asyp túsken.
Sarapshylar ınvestorlardyń jyl sanap «jasaryp» kele jatqanyn da eske salady. Brokerlik shot ashyp, ınvestısııa áleminiń qyr-syryna qanyqqysy kelgen jeke tulǵalardyń teń jartysyna jýyǵynyń (48,2 paıyzy) jasy 35-ke jetpegender eken. Jyl bastalǵaly 18-24 jas aralyǵyndaǵy ınvestorlar sany 2,5 ese ósip, 59 myń adamdy quraǵan. Al kámeletke tolmaǵan azamattar atynan ashylǵan sýbshottar úlesi ádettegideı 0,1 paıyzdan da aspaıdy.
«Naryqqa kirýge baılanysty biraz kederginiń alynyp tastalýy ınvestorlar bazasyn jasartýǵa septigin tıgizdi. Kúshi joıylǵan barerler retinde birinshi kezekte brokerlik shot ashý prosesiniń jeńildetilýin atap ótýge bolady. Buǵan qashyqtan otyryp ıdentıfıkasııa jasaý múmkindigi men jańa sıfrly brokerlik qosymshalardyń paıda bolýy áser etti», deıdi Ortalyq depozıtarıı basqarma tóraǵasy Ádil Muhamedjanov.
Sonymen birge bólshek ınvestorlardyń basym úlesin 35-54 jas aralyǵyndaǵy (35,2 paıyz) azamattar qurap tur. Odan keıingi kezekte 29,2 paıyz úlespen 25-34 jas aralyǵyndaǵy azamattar kele jatsa, aǵa býyn tórtinshi pozısııada eken. Bul rette jasy 55-ten asyp ketken ınvestorlar úlesi 21,2-den 16,6 paıyzǵa azaıyp ketken.
«Genderlik qatynas boıynsha aıtarlyqtaı turaqtylyq ańǵarylady. Brokerlik shot ıeleriniń arasynda áıelder úlesi 42 paıyzdy quraıdy. Bir aı buryn da solaı bolǵan. Al absolıýtti kórsetkishte kishigirim ósim baıqalady, jańadan 8 701 áıel azamat qatarǵa qosylǵan. Bul rette jyl basynan beri baǵaly qaǵazdar naryǵyndaǵy áıel-ınvestorlar sany 1,5 ese ósti. О́ńirlerge keler bolsaq, respýblıkalyq mańyzy bar qos qala – Almaty (22,8 paıyz) men Nur-Sultanda (9,4 paıyz) sýbshottardyń kóbirek tirkelgeni baıqaldy. Úshinshi orynda 9,1 paıyzben Túrkistan oblysy. Al Qostanaı, Aqmola jáne Soltústik Qazaqstan oblystarynda ınvestorlyq belsendilik tómen deńgeıde», dep habarlaıdy Ranking sarapshylary.
