Dosaevtyń aıtýynsha, mamyrda qalalyq máslıhatqa Bostandyq aýdany aýmaǵyna 9 qabattan bıik turǵyn úı salýdy shekteıtin qujat usynylady.
Qazir Bostandyq aýdanynda, onyń ishinde «Mega sentr», «ADK» saýda ortalyqtarynyń, burynǵy jemis konservileý kombınatynyń janynda, sondaı-aq Sátbaev – Baıtursynov – Buqar jyraý kósheleri – Esentaı ózeni bóliginde turǵyn úı qurylysy qarqyndy júrip jatyr.
«Qurylys máselelerin júıeli túrde sheshý úshin bıyl mamyrda Abaı dańǵylynyń ońtústiginde Shyǵys aınalma jolynan Iаssaýı kóshesine deıin 9 qabattan bıik ǵımarat salýdy shekteıtin jańa reglament qala máslıhatynyń bekitýine usynylady, ıaǵnı bul perımetrge barlyq Bostandyq aýdany kiredi», dedi E. Dosaev.
Ákimniń aıtýynsha, áleýmettik ınfraqurylym obektilerin mindetti túrde salý talaptaryn eskerip, qurylys salý tásilderi qaıta qaraldy.
«Buryn ruqsat berý kezinde qurylys salýshylardan bul qatań talap etilmegen», deıdi ákim.
