Mámilege Qazaqstan damý bankinde jeńildikpen kredıt berý baǵdarlamasy boıynsha resimdelgen avtokredıtterdiń bir bóligi, kepilsiz kredıtterdiń, kezek kúttirmeıtin muqtajdyqtarǵa arnalǵan qaryzdardyń jáne ıpotekalyq kredıtterdiń bir bóligi kirip otyr. Berilgen kredıtter boıynsha negizgi qaryzdyń jalpy kólemi 330 mlrd teńgeni quraıdy. Bul rette 2022 jylǵy 1 sáýirdegi jaǵdaı boıynsha Sberbanktiń tutynýshylyq qaryzdarynyń kredıttik qorjyny 1,1 trln teńgege teń.
«Sberbank» AQ Qazaqstandaǵy enshiles bankiniń basqarma tóraǵasy Eldar Teńizbaev qaryzdardy qaıta tabystaý bank sektoryndaǵy qalypty tájirıbe hám ádettegi rásim ekenin atap ótti.
– О́ziniń kóp jyldyq tarıhynda «Sberbank» birneshe ret túrli syn-qaterlermen betpe-bet keldi. Olardy árdaıym sátti eńserip, óz klıentteriniń múddesin basty nazarǵa aldy. Biz mindetterimizdi klıentter aldynda da, memleket aldynda da oryndaýǵa tyrysamyz. Búgingi tańda «Sberbank» barlyq memlekettik qarjyny, onyń ishinde jeńildikpen kredıt berý baǵdarlamalary boıynsha berilgen qarjyny qaıtardy. Nesıe portfeliniń bir bóligin berý qarjy salasynda keń taralǵan tájirıbe. Klıentterdiń basqa bankke aýysýy esh qıyndyqsyz retteledi. Bul – seriktes bank úshin nesıe portfelin ulǵaıtý múmkindigi. Biz atalǵan mámileden klıentterimizdiń qajettilikterin qamtamasyz etý úshin qajetti qosymsha ótimdilikti alamyz, – dedi Eldar Teńizbaev.
Halyk Bank-tiń basqarma tóraıymy Úmit Shaıahmetova bank Qazaqstan ekonomıkasy úshin júıe quraýshy qarjy ınstıtýty retinde eń aldymen qoǵamnyń múddesi úshin jumys isteıtinin jetkizdi.
– Jeke tulǵalardyń nesıe portfeliniń edáýir bóligin satyp alyp, osylaısha «Sberbankke» ótimdilik bere otyryp, Halyk Bank Qazaqstannyń bank sektorynyń turaqtylyǵyn qoldady. Búgingi tańda Halyk Bank-ke jeke tulǵalardyń qaryzdary boıynsha bereshek qaldyǵy aýdaryldy jáne bul merzimi keshiktirilmegen jáne problemalyq kredıttersiz sapaly portfel ekenin atap ótken jón. О́z tarapymyzdan biz «Sberbankten» Halyk-qa úzdiksiz kóshý úshin barlyq qajetti sharalardy qamtamasyz ettik, – deıdi Ú.Shaıahmetova.
Qazaqstan damý bankiniń basshysy Rýslan Ysqaqov qarjy ınstıtýty jeńildetilgen avtonesıeleý baǵdarlamasy sheńberinde ıgerilgen qarajatty memleketke qaıtarýdyń kepili ekenin jetkizdi.
– Damý banki – baǵdarlama operatory. Sondyqtan baǵdarlamany iske asyrýdyń búkil merzimi ishinde oǵan qatysatyn ekinshi deńgeıli bankterdiń tólem qabilettiligine qaramastan, alynǵan qarajattyń memleketke qaıtarylǵany úshin tolyq jaýapty bolady. Qazirgi ýaqytta Reseı bankteriniń enshiles kompanııalaryna sanksııalar engizilýine baılanysty jeńildetilgen avtokredıtter bereshegin ekinshi deńgeıli basqa bankterge aýdarý boıynsha jedel jumys júrgizildi, – dedi R.Ysqaqov.
Jeke tulǵalardyń kredıtteriniń kóshi-qon prosesi iske qosyldy jáne klıentter eshqandaı qıyndyqpen betpe-bet kelip otyrǵan joq.
Osy oraıda, «Sberbank» klıentteriniń qoldanystaǵy qaryzdaryna qatysty talaptar, atap aıtqanda nesıe beresheginiń qaldyǵy, nesıe berý merzimi, aı saıynǵy tólem jáne nesıe mólsherlemesi ózgerissiz qalady. Qaryzdy qaıta tabystaý klıent úshin qosymsha shyǵynǵa ákep soqpaıdy. Sondaı-aq qaryz boıynsha quqyqtardy basqaǵa berý, eger qaryz alýshy negizgi borysh boıynsha aı saıynǵy tólemderdi jáne eseptelgen paıyzdar boıynsha tólemderdi buzbasa, onyń kredıttik tarıhyna áser etpeıdi. Keste boıynsha aı saıynǵy óteý kúni ózgerissiz qalady.
Eger «Sberbanktiń» qaryz alýshysy Halyk Bank-tiń klıenti bolmasa, nesıe boıynsha tólemderdi júzege asyrý úshin oǵan Halyk Homebank mobıldi qosymshasyn júktep, tirkeýden ótý qajet. Sodan keıin oǵan qaryzdy óteý úshin plastıksiz Halyk Bonus Digital sıfrly kartasy dereý ashylatyn bolady. Aı saıynǵy tólem somasy keste boıynsha tólem jasaý kúni Halyk Bank kartasynan/shotynan avtomatty túrde alynady. Sondyqtan klıent óziniń kartakalyq nemese aǵymdaǵy shotyn únemi tolyqtyryp otyrýy qajet.
13 sáýirden bastap kredıtteri Halyk Bank-ke aýdarylǵan klıentter óz qaryzynyń mártebesin JSN boıynsha bank saıtynda silteme arqyly teksere alady.
