Saýaldamaǵa qatysýshylardyń 63 paıyzy aldaǵy 12 aıda baǵa ósiminiń qarqyny saqtalady nemese budan da jedeldeıdi dep kútedi. Respondentter ony aıyrbastaý kýrsynyń ózgerýi, azyq-túliktiń qymbattaýy jáne syrtqy saıası jaǵdaılarmen baılanystyrady.
Qatysýshylardyń 51 paıyzy ótken aılardaǵy ózgerissiz qalǵan ne bolmasa ortasha ózgergen baǵa ósimin atap ótken. Baǵa tym qatty ósti degen 86 paıyz respondent negizinen azyq-túlik ónimderin meńzegen. Olar et ónimderi, ósimdik maıy, jumyrtqa jáne nan ónimderinen ózge azyq-túlik túrleriniń baǵasy tym qatty kóterilip ketti deıdi. Qatty qymbattaǵan ónimder retinde olar negizinen qant, sút ónimderi, syr, shujyq, alkogolsiz sýsyndar, shaı men kofeni ataǵan.
Saýaldamaǵa súıensek, 21 paıyz qazaqstandyqtyń jınap otyrǵan qosymsha qarjysy bar. 39 paıyzy dál qazirgi sátte qarjy jııýǵa qatysty beıtarap kózqaras tanytsa, jınaǵy bar 35 paıyz respondenttiń qarjylary burynǵy deńgeıinde qalǵan. Al 32 paıyzynda jınaqtary azaıyp ketken. 53 paıyz qatysýshynyń jeke materıaldyq jaǵdaıy ózgerissiz qalsa, 32 paıyzynda aıtarlyqtaı tómendegen.
Sonymen qatar eldiń qysqa jáne uzaq merzimdi damýyna qatysty kózqarastyń da optımızmnen alystaǵanyn baıqaýǵa bolady. Aldaǵy 1 jáne 5 jyl kóleminde eldiń damý perspektıvasyn oń baǵalaǵan qatysýshylar úlesi 45 jáne 44 paıyzdy quraǵan. Byltyr aqpanda bul kórsetkish 52 jáne 50 paıyz deńgeıinde bolǵan eken. Olardyń 28 paıyzy bir jyldan soń qarjylyq jaǵdaıymyz jaqsarady dep úmittense, 27 paıyzy kerisinshe, jaǵdaıymyz nasharlaıdy dep alańdaıdy.
