Eki eldiń akademııasy mańyzdy memorandýmǵa qol qoıdy

Bishkekte ótip jatqan «Túrki halyqtarynyń memleket basqarý dástúri» atty halyqaralyq I ǵylymı kongresi aıasynda Túrki akademııasy men Qyrǵyz Respýblıkasynyń Ulttyq ǵylym akademııasy mańyzdy memorandýmǵa qol qoıdy. Bul týraly Túrki akademııasynyń baspasóz qyzmeti habarlady. Jıyn barysynda baýyrlas eki akademııanyń prezıdentteri Darhan Qydyráli men AbdyganyErkebaev túrkologııa salasynda birlese ǵylymı zertteýler jasaýdyń mańyzdylyǵyna toqtaldy. Jas ǵalymdardy yntymaqtastyqqa tartý máselesine basa mán berildi. Taraptar negizgi jumystaryn túrki halyqtarynyń tarıhy men mádenıeti, túrki tilderi jáne ádebıetteri, fılosofııasy, túrkitildes memleketterdiń zań salasy, ekonomıkasy jáne saıasaty, sondaı-aq, qazaq-qyrǵyz baılanystaryna baǵyttaıdy. Memorandým aıasynda ǵylymı jobalarǵa baılanysty ǵylymı-zertteý toptarynyń kúshterin paıdalaný, birlese otyryp konferensııalar, sımpozıýmdar nemese jumys toptaryn uıymdastyrý; ǵylymı-tehnıkalyq qujattardy  ózara almastyrý jaıy qarastyrylǵan. Sonymen, eki eldiń akademııasy qol qoıylǵan qujattyń nátıjesin dál baǵamdap otyrý úshin Astana nemese Bishkekte jylyna bir ret kezdesý ótkizýge kelisti. Jalpy, «Túrki halyqtarynyń memleket basqarý dástúri» atty halyqaralyq ǵylymı kongresi alǵash ret uıymdastyrylyp otyr. Taǵy bir atap óterimiz, kórshi el bıyl «Qyrǵyz memlekettigin nyǵaıtý jyly» degen mańyzdy sharany jarııalap, onyń aıasynda atqarylatyn isterdi pysyqtaý úshin ǵalymdardyń ýájderin tyńdaýdy jón sanapty. Al osy aıtýly jıynda sóz alǵan Túrki akademııasynyń prezıdenti Darhan Qydyráli myńdaǵan jyldyq tarıhy bar túrkiler óz dáýirlerinde birqatar alyp ımperııalar qurǵanyn jáne ony tabysty basqarǵanyn atap ótti. Sondaı-aq, ol Júsip Balasaǵunnyń memleket basqarý týraly jazǵan «Qutty bilik» shyǵarmasynyń mańyzyna keńirek toqtaldy. Ǵylymı kongreske AQSh, Qazaqstan, О́zbekstan, Ázirbaıjan, Koreıa, Japonııa men Reseı syndy elderdiń zertteýshi ǵalymdary qatysýda. Shara aıasynda Túrki akademııasy men qyrǵyz-túrik halyqaralyq Manas ýnıversıteti ózara yntymaqtastyq týraly kelisimge qol qoıdy. Dastan Kenjalın. Derekkóz: Túrki akademııasynyń baspasóz qyzmeti. Foto: Time.kg.