О́zbekstanda dúnıege kelgen 27 jastaǵy Rahmonov atalǵan reıtıngte ekinshi orynda tur. Ol óziniń toǵyz qarsylasyn birinshi raýndta esinen tandyrsa, beseýin ekinshi kezeńde oısyrata utty. Tek osydan tórt jyl buryn Astanada ótken jarysta ózbekstandyq Farıdýn Odılovtyń ǵana biraz ýaqyt boıy Shavqattyń ekpindi shabýylyna toıtarys berýge shamasy jetti. Biraq úshinshi raýnd bel ortaǵa taıaǵanda qazaq sportshysy ony uryp jyqty.
Qazirgi kezde qandasymyz óz salmaǵy boıynsha UFC-reıtınginde 15-oryndy ıelenýde. Ol osy promoýshendegi úsh kezdesýinde de qarsylastaryn bas kótertpeı utty. Bıylǵy jyldyń maýsym aıynda jerlesimiz úzdikter tiziminde 10-satyǵa jaıǵasqan amerıkalyq Nıl Megnımen aıqasady. AQSh-tyń apaıtósin jeńgen jaǵdaıda Shavqat Rahmonovtyń bedeli kúrt ósip, reıtıngte de birneshe satyǵa joǵarylaıtyny anyq.
Joǵaryda atalǵan reıtıngte Tom Aspınall kósh bastap keledi. 28 jastaǵy Ulybrıtanııa ókiliniń osy sport túrin serik etkeli segiz jylǵa jýyqtady. Sol aralyqta 14 márte oktagonǵa shyǵyp, 12 básekede onyń mereıi ústem boldy. Tom UFC-degi barlyq bes kezdesýin merziminen buryn aıaqtady. Ol Djeık Kole, Alan Býdo, Andreı Orlovskıı, Sergeı Spıvak jáne Aleksandr Volov syndy sańlaqtardyń tas-talqanyn shyǵardy. Alyptardyń reıtınginde Aspınall altynshy oryndy enshileýde.
Úshinshi oryndy OAR ókili Drıkýs dıý Plessı (16-2-0) ıelense, shotlandııalyq Pol Kreıg (16-4-1) pen ıspanııalyq Hoel Alvares (19-3-0) tórtinshi jáne besinshi satylarǵa taban tiredi. Bul jigitterdiń barlyǵynyń sporttyq karerasynda jeńilister bolǵanymen, UFC jarystarynda olar eshkimge ese jibergen emes.
