Dúnıejúzilik EXPO 2020 DUBAI kórmesiniń taqyryby – «Aqyl-oıdy biriktire otyryp, bolashaqty qalyptastyrý». Taıaý Shyǵysta alǵash ret uıymdastyrylǵan kórme 2021 jyldyń 1 qazanynan 2022 jyldyń 31 naýryzyna deıin jumys istedi. Oǵan 192 memleket pen 30 halyqaralyq uıym qatysty. 24 mln-nan astam adam kórmeni tamashalaý múmkindigine ıe boldy.
EXPO 2020 DUBAI uıymdastyrý komıteti habarlaǵandaı, Qazaqstannyń ulttyq pavılony kórmedegi eń tanymal úzdik 10 pavılonnyń qataryna endi. Ony 1,6 mln-nan astam adam men 1 myńnan astam resmı delegasııa tamashalady.
Bizdiń pavılondy eń alǵash bolyp Birikken Arab Ámirlikteriniń Premer-mınıstri Muhammed ıbn Rashıd ál-Maktým men Dýbaıdyń murager hanzadasy Hamdan ıbn Muhammed Ál Maktým aralap, oń baǵasyn berdi. Mártebeli meımandar kórmeniń alǵashqy kúninde Qazaqstanmen qatar Birikken Arab Ámirlikteri, AQSh pen Qytaı syndy alpaýyt elderdiń ulttyq pavılonyna bas suqty.
EXPO 2020 DUBAI qorytyndysy boıynsha Qazaqstan pavılony Halyqaralyq kórmeler bıýrosynyń «Taqyrypty ashý» bas nomınasııasy boıynsha kúmis júldege ıe boldy. 192 memlekettiń ishinen Germanııa (birinshi oryn) jáne Italııa (úshinshi oryn) elderimen birge úzdik úshtikke engen Qazaqstannyń álem aldyndaǵy mártebesi kezekti ret asqaqtady.
Sonymen qatar Qazaqstan amerıkalyq Exhibitor Magazine jýrnalynyń nusqasy boıynsha «Úzdik tusaýkeser» nomınasııasynda birinshi oryndy jáne «Úzdik pavılon» nomınasııasynda úshinshi oryndy ıelendi.
Kórme ýaqytynda bizdiń pavılonda 51 is-shara uıymdastyryldy. Onyń qorytyndysy boıynsha 16 kelisim men memorandým jasaldy. Respýblıka óńirleri ózderiniń áleýmettik-ekonomıkalyq jáne mádenı-týrıstik múmkindikterin tanystyrýǵa belsendi qatysty.
Kazakh Tourism ulttyq kompanııasy «Qazaqstannyń týrızm kúnderin» uıymdastyrdy. Al QazTrade kompanııasy eldiń eksporttyq áleýetin pash etti. Osy oraıda azyq-túlik, aýyl sharýashylyǵy jáne halal ónimderdiń sertıfıkatyn taný týraly kelisim jasaldy. Ol otandyq ónimderdi Birikken Arab Ámirlikteri naryǵyna jetkizýge jol ashady.
Qazaqstannyń kórmedegi ulttyq kúni aıasynda saýda-ınvestısııalyq forým uıymdastyryldy. Oǵan Birikken Arab Ámirlikteriniń energetıka jáne ınfraqurylym mınıstri Sýheıl ál-Mazrýı, osy eldiń memlekettik mınıstri Ahmed Álı ál-Saeh qatysty.
– Dúnıejúzilik EXPO 2020 DUBAI kórmesine qatysý Qazaqstanǵa ekonomıkalyq turǵydan tıimdi bolǵany daýsyz. Sondaı-aq bizdiń el jahan jurtshylyǵyna bıznesti, ǵylymdy, týrızmdi jáne adamı resýrstardy damytýda zor múmkindikterge ıe ekenin tanytty, halyqaralyq arenadaǵy bedelin odan ári nyǵaıta tústi. Pavılonda el ekonomıkasynyń túrli salasy, onyń ishinde ınvestısııalyq, týrıstik, ónerkásiptik, kólik-logıstıkalyq jáne agrarlyq áleýeti, sondaı-aq tarıhı jáne mádenı murasy barynsha pash etildi, – deıdi QazExpoCongress ulttyq kompanııasynyń basqarma tóraǵasy Allen Shaıjúnisov.
Kórme ǵylym, bilim, mádenıet jáne óner salasynda tájirıbe almasý turǵysynan da biregeı alań bolǵanyn atap ótken durys. Bizdiń ǵalymdar men otandyq joǵary oqý oryndarynyń ókilderi jasandy ıntellekt pen bilimniń ózara baılanysyn, saladaǵy aǵymdyq úrdister men ázirlemelerdi, basqa da mańyzdy taqyryptardy talqylady. Otandyq ınnovasııalyq bilim berý salasynyń startap jobalary usynyldy.
Kórmege kelýshiler bizdiń pavılonda Gınnestiń rekordtar kitabyna engen Jer planetasynyń prototıpi «Ǵalam sýreti» art-jobasyn tamashalady. Pavılonnyń mádenı baǵdarlamasy aıasynda Aıman Musaqojaeva, Maıra Muhamedqyzy, Marııa Mýdrıak, Dımash Qudaıbergen syndy óner maıtalmandary, Dinzýhra Tilendıeva jetekshilik etetin N.Tilendıev atyndaǵy «Otyrar sazy» akademııalyq folklorlyq-etnografııalyq orkestri Dýbaı aspanyn án-jyrǵa bóledi.
Qazaqstannyń ulttyq taǵamdar meıramhanasy kelýshilerdi erekshe tántti etti. Etnostyq mýzykalyq ujymdardyń oryndaýyndaǵy ashyq alańdaǵy kúndelikti qoıylymdar aıryqsha atmosfera syılady.
QazExpoCongress ulttyq kompanııasy men EXPO 2020 DUBAI uıymdastyrý komıteti arasyndaǵy kelisimge sáıkes EXPO 2017 ASTANA nysandaryn kórmeden keıin paıdalanýdaǵy Qazaqstannyń tájirıbesi nazarǵa alyndy. Bizdiń eldegi tájirıbe kórsetkendeı, kórme nysandary jańa ekojúıege aınaldy jáne olar ózin-ózi aqtap jatyr. Sondyqtan EXPO 2020 DUBAI uıymdastyrýshylary da Qazaqstan tájirıbesine súıenip, kórme aýmaǵyn jańa District 2020 iskerlik ortalyǵyna aınaldyrmaq. Bul rette kórmeniń uıymdastyrý komıteti birqatar elge, onyń ishinde Qazaqstanǵa óz pavılondaryn saqtaýdy usyndy. Mundaı sheshimdi qazirdiń ózinde Saýd Arabııasy, Úndistan, Aýstrııa, Lıýksembýrg sekildi elder qup kórip otyr.
IT-saladaǵy álemdik iri kompanııalar men Birikken Arab Ámirlikteriniń ENOC, Emirates, DP World sııaqty alpaýyttary jańa iskerlik ortalyqtyń aýmaǵynda óz keńselerin ashatyn boldy.
Qazaqstan da óz pavılonyn elimizdiń eksporttyq-ınvestısııalyq áleýetin odan ári ilgeriletý jolynda tıimdi paıdalanýdy josparlap otyr.
Endi dúnıejúzilik kórmeni 2025 jyly Japonııanyń Osaka qalasy ótkizedi.
