Baspa salasynyń basshylyq qyzmetterinde júrse de shyǵarmashylyqtan qol úzbedi. Bıtabar balýan týraly jazǵan «Jyl qusy» hıkaıaty Odaqtyq kásipodaqtyń arnaıy júldesin jeńip aldy. «Dókeı kele jatyr» atty dramasy oblystyq jáne respýblıkalyq sahnalardan jıi kórindi. Jazýshy tyń taqyryptardy qamtýǵa tyrysatyn. Onyń adam men ıt arasyndaǵy jalǵansyz jaqyndyqty arqaý etken «It ashýy» hıkaıaty kezinde qazaq ádebıeti janashyrlarynyń arasynda úlken rezonans týdyrǵan. Kórkem aýdarma salasynda da ol jemisti eńbek etip, L.Tolstoıdyń, R.Tagordyń shyǵarmalaryn tárjimalady. Onyń «Aǵalardyń alaqany» atty áńgimeler jınaǵy Memlekettik syılyq aldy.
Safekeń kórkemsózdiń sheberi ǵana emes, qaıratty qoǵam qaıratkeri de bola bilgen jan. Onyń Jeltoqsan oqıǵasynan keıin Jazýshylar odaǵynda Qazaqstan KP Ortalyq komıtetiniń birinshi hatshysy G.Kolbınmen kezdesýde sóılegen sózi naǵyz qaısar, ulty úshin jany shyrqyraıtyn patrıot ekenin kórsetti. Jazýshy Juban Moldaǵalıev ekeýi ǵana qalǵan jurt aýyzdaryn ashýǵa batyldary barmaı otyrǵanda, qazaq halqynyń sol kezdegi narazylyǵyn G.Kolbınniń qulaǵyna ashyq jetkize aldy. Odan keıingi ýaqyttarda Safekeńniń qazaq mektepterin ashý jolynda kóp ter tókkenin zamandastary únemi eske alyp júredi.
Soltústik Qazaqstan oblysynyń turǵyndary Maǵjan Jumabaev, Sábıt Muqanov, Ǵabıt Músirepovten keıin týǵan qazaq ádebıetiniń kórnekti ókili, ózderiniń jerlesteri Safýan Shaımerdenovti oryndy maqtan tutady. Jazýshynyń mereıtoıyna oraı oblystyń tórt jerinde merekelik is-sharalar uıymdastyryldy. Sonyń ishinde oblystyq mýzeıde, Ǵabıt Músirepov atyndaǵy oblystyq kitaphanada, Jambyl aýdanyndaǵy mádenıet úıinde merekelik sharalar ótkizilip, jazýshy týraly estelikter aıtylyp, jyrlar oqylyp, ánder tógilip jatty.
Merekelik sharalardyń eń úlkeni Safýan Shaımerdenov atyndaǵy klassıkalyq gımnazııada bolyp, oǵan oblys ákiminiń orynbasary Ǵanı Nyǵymetov, oblystyq bilim basqarmasynyń basshysy Názir Jáshibekov, jazýshynyń balasy, belgili jýrnalıst Saıyn Esmaǵı jáne jergilikti aqyn-jazýshylar, ádebıetsúıer qaýym ókilderi, jýrnalıster qatysty. Respýblıkaǵa belgili aıtys aqyndary Jarqyn Juparhan men Amanjol Zaǵyparlar jazýshyǵa arnaǵan sııasy áli keppegen jańa óleńderin oqydy. Kezdesýde jazýshynyń esimin máńgi este qaldyrý týraly jańa usynystar men ıdeıalar aıtyldy. Oblysqa belgili kásipker, mesenat Birjan Shaımerdenov jazýshy atyndaǵy osynaý bilim ordasynyń qabyrǵasyna kórnekti taqta ornatqan eken, jıyn barysynda sonyń ashylý saltanaty da boldy. Kezdesýge jazýshynyń nemere qyzdary Zeınesh pen Zeınep te qatysty. Sóıtip, S.Shaımerdenovtiń 100 jyldyq mereıtoıy týǵan jerinde dúbirli toı bolmasa da dúrkiregen kezdesýlermen bastaldy.
Soltústik Qazaqstan oblysy
