Qamdanǵan qapy qalmaıdy

2016 jyly Rıo-de-Janeıroda ótetin Olımpııa oıyndaryna oraı, qazaqstandyq sportshylardyń daıyndyǵyna basa nazar aýdarý qajet. Sporttyq jekpe-jek jáne kúsh qoldanylatyn sport túrleri konfederasııasynyń tóraǵasy Tımýr Qulybaev jumys keńesinde osyndaı tapsyrma berdi. Jınalysqa kúres, dzıýdo, taek­­vondo (WTF), aýyr atletıka fe­de­rasııalarynyń jetekshileri men bapkerler quramy qatysty. «Tórt jylda bir ret ótetin baıraqty básekege nebári eki jyl ǵana qaldy. Sondyqtan da sizder otandyq sportshylardy Olımpıada oıyndaryna meılinshe myqtap daıyndaýlaryńyz qajet», dedi Konfederasııa tóraǵasy. Otyrys barysynda Konfe­derasııa quramyna kiretin sport túrleri boıynsha ulttyq qura­ma komandalarynyń bas jattyq­­­tyrýshylary esep berip, aldaǵy josparlaryn ortaǵa saldy. Al federasııalar prezıdentteri bıyl Qazaqstanda ótetin kúres túrlerinen Azııa chempıonatyn (23-27 sáýir), aýyr atletıkadan lısenzııalyq álem chempıonatyn (4-16 qarasha), taekvondodan (WTF) Búkilálemdik Gran-prı jarysy (29-31 tamyz) jáne dzıýdodan bolatyn álemdik Gran-prı týrnırin (qazan aıy) ótkizýdiń daıyndyq barysyn jetkizdi. Sondaı-aq, jıyn barysynda ult­tyq qurama komandalardy jattyǵý jáne jarys barysynda keshendi-ǵylymı toptardyń mamandarymen qamtamasyz etý máseleleri de qaraldy. Federasııalarǵa aımaqtarda mamandandyrylǵan mektep-ınternattar men kolledjderdiń materıaldyq bazalaryn nyǵaıtý, sol oqý ordalaryndaǵy bapker-ustazdar qaýymynyń biliktilikterin arttyrý arqyly buqaralyq jáne joǵarǵy jetistikter sportyn damy­týǵa basa nazar aýdarý tapsyryldy. Mundaı is-sharalar deni saý urpaqty qalyptastyrýǵa jáne ulttyq quramalarǵa qajetti kadrlyq rezervti daıyndaýǵa septigin tıgizbek. Bul óz kezeginde Qazaqstannyń álemdik sport arenasynda budan da tabysty óner kórsetýine muryndyq bolary sózsiz. Jiger ÁZBERGENOV.