Oblystyq jolaýshylar kóligi jáne avtomobıl joldary basqarmasynyń basshysy Samat Aıtqalıevtyń málimetinshe, «Rossııa» áýe kompanııasy 23 sáýirde «Superjet 100» ushaǵymen áýe reısin bastaıdy.
«Reseılik áýe kompanııasynyń «Atyraý–Máskeý–Atyraý» baǵytyndaǵy ushaǵy aptasyna 3 ret – dúısenbi, sársenbi, senbi kúnderi qatynaıdy. Atyraýdan saǵat 17:40-ta ushady. Máskeýden ushqan ushaq Atyraýǵa saǵat 16:30-da qonady. Ushý uzaqtyǵy – 2 saǵat 20 mınýt. Al «Air Astana» áýe kompanııasy 26 sáýirde «Atyraý–Ystanbul–Atyraý» baǵytynda jańa reıs ashady. Bul áýe reısi seısenbi, juma kúnderi oryndalady. Atyraýdan Ystanbul baǵytyna qatynaıtyn ushaq saǵat 08:10-da áýege kóteriledi. Ystanbuldan Atyraý qalasyna saǵat 17:05-te kelip qonady. Áýe reısiniń ushý uzaqtyǵy – 4 saǵat 10 mınýt. Bılet quny Máskeý baǵytyna 93 myń, Ystanbulǵa deıin 114 myń 300 teńgeden bastalady», dep málim etti S. Aıtqalıev.
Onyń aıtýyna qaraǵanda, 26 sáýirde Atyraýdan Reseıdiń Astrahan qalasyna qatynaıtyn áýe reısiniń alǵashqy ushaǵy ushady. «Qazaq Air» áýe kompanııasynyń «BC Bombardier Dash 8-400» ushaǵy seısenbi, senbi kúnderi Atyraýdan saǵat 10:40-ta áýege kóteriledi. Atyraýǵa seısenbide saǵat 13:00-de, senbi kúni saǵat 12:40-ta kelip qonady. Eki aralyqqa ushý ýaqyty 50 mınýtty quraıdy. Bir baǵyttaǵy bılet quny 35 myń 800 teńgeden bastalady.
Aıana Toǵanbek
