Basylym Batys Qazaqstan oblysyndaǵy kúre joldar jaǵdaıynyń nasharlyǵyna baılanysty másele kótergen. Prezıdent bul óńirdiń kólik-logıstıkalyq áleýetin jańǵyrtý mańyzdy mindettiń biri ekenin jáne avtojoldardyń 70 paıyzynyń sapasy syn kótermeıtinin 2019 jyly aıtqan bolatyn. Memleket basshysy Oralda ótken kezdesýde «bul azamattardyń kúndelikti ómirinde qıyndyq týǵyzyp qana qoımaıdy, sondaı-aq óńirdiń eksporttyq jáne tranzıttik áleýetin tómendetedi» degen edi.
Prezıdent sol kezde Úkimetke ákimdikpen birlesip, Qaztalov, Jánibek jáne Bókeı ordasy aýdandaryndaǵy joldardy jóndeý jumystaryn 2021 jyldyń sońyna deıin aıaqtaýǵa tapsyrma berdi jáne bul másele óziniń jeke baqylaýynda bolatynyn erekshe atap ótti. Alaıda «Egemen Qazaqstan» gazetindegi málimetter boıynsha osy aýdandardy oblys ortalyǵymen baılanystyratyn joldarǵa áli kúnge deıin asfalt tóselmegen. Qurylys jumystary bekitilgen kesteden aıtarlyqtaı qalyp keledi jáne qarjy máselesinde de túıtkilder bar. Jergilikti turǵyndar joldyń joqtyǵynan zardap shegip otyr, ásirese kóktem men kúzde jaǵdaı múlde ýshyǵa túsedi.
«Memleket basshysy Úkimet pen oblys ákimdigine barlyq qajetti sharany tez arada qabyldaýdy tapsyrdy. Tıisti jumystardyń belgilengen merzimde oryndalmaýyna kináliler jazalanýǵa tıis», dep jazylǵan habarlamada.
Prezıdent bul máseleni sheshýdi Premer-Mınıstr Álıhan Smaıylovqa júktedi.
Maqalany myna jerden oqı alasyz.
