Kúni keshe Memleket basshysy Qasym-Jomart Toqaev Úkimetke jáne Batys Qazaqstan oblysynyń ákimdigine óńirdegi joldardy jóndeý boıynsha barlyq qajetti sharany dereý qabyldaýdy tapsyrdy.
Osyǵan baılanysty Úkimet basshysy birinshi kezekte 94 myń turǵyny bar 50 eldi mekendi baılanystyryp otyrǵan «Podstepnoe – Fedorovka – RF shekarasy» avtojolynyń ýchaskesine bardy.
Jol Qarashyǵanaq ken ornyna deıin jetedi jáne Reseıge tranzıttik dáliz bolyp otyr. Qazirgi ýaqytta kúre joldyń jaǵdaıy óte nashar, ári-beri ótken Qazaqstan men basqa da elderdiń ondaǵan myń azamaty jol azabyn tartyp otyr.
«Kúre joldardyń jaǵdaıy – Batys Qazaqstan oblysyndaǵy eń kúrdeli máselelerdiń biri. Bıylǵy jyly biz bul jumystardyń aýqymdy bóligin aıaqtaýymyz kerek. Osydan úsh jyl buryn bastalǵan bul jobalar qarjynyń jetispeýshiliginen bitpeı qaldy. Bıyl joldardy jóndeýge 15 mlrd teńge kózdelgen, eger jumys qarqynyn tezdetýge tehnıkalyq jaǵdaı múmkindik berse, qosymsha qarajat bólýge bolady. Bıýdjetti naqtylaý kezinde biz «Podstepnoe – Fedorovka – RF shekarasy» avtomobıl jolyna arnaıy 6 mlrd teńge qarastyrdyq. Joldardy jóndeý jumystaryn 2022-2025 jyldary aıaqtaý qajet», dedi Álıhan Smaıylov.
Úkimet basshysy oblys ákimdigine Indýstrııa jáne ınfraqurylymdyq damý mınıstrligimen birlesip, bul máseleni baqylaýda ustap, qarajattyń tıimdi ıgerilýin qamtamasyz etýdi tapsyrdy.
Budan keıin Premer-Mınıstr ósimdik maıy men kúnjara óndiretin kásiporyn «Poıma maı kombınaty» JShS-ǵa bardy.
Zaýytta 135 adam jumys isteıdi, al onyń ónimi (jylyna shamamen 50 myń tonna) tek BQO-da jáne kórshiles oblystarda ǵana emes, sondaı-aq Túrkimenstanda, О́zbekstanda, Aýǵanstanda, Tájikstanda jáne Reseıde suranysqa ıe.
2,8 mlrd teńge memlekettik qoldaý alǵan kásiporyn «aınalym shemasy» arqyly baǵany turaqtandyrý saıasatyn iske asyrýǵa belsendi qatysýda, sonyń arqasynda ósimdik maıynyń baǵasy aıtarlyqtaı tómendedi.
«О́zderińiz biletindeı, eldiń azyq-túlik qaýipsizdigin qamtamasyz etý Memleket basshysynyń erekshe baqylaýynda. Osyǵan baılanysty naryqty otandyq aýyl sharýashylyǵy ónimderimen tolyqtyrý boıynsha júıeli jumys júrip jatyr. Olardyń ishinde áleýmettik mańyzy bar azyq-túlik taýarlary – birinshi kezekte.
Naryqty kúnbaǵys maıymen qamtamasyz etý úshin qaıta óńdeý kásiporyndaryn shıkizatpen qamtý boıynsha sharalar qabyldanyp jatyr. Osy maqsatta kúnbaǵys tuqymy men kúnbaǵys maıyn shyǵarýǵa kvota engizilgeni belgili», – dedi QR Premer-Mınıstri.
Jumys saparynyń kelesi nysany úsh aýysymmen oqytýdy joıý sharalary aıasynda iske qosylǵan 300 oqýshyǵa arnalǵan №18 mektep-bóbekjaı-balabaqsha kesheni boldy.
Premer-Mınıstr «Bilimdi ult» ulttyq jobasynda bilim berýdiń qoljetimdiligi men sapasyn qamtamasyz etý úshin qajetti sharalar kózdelgenin atap ótti.
2021 jyly 534 balabaqsha ashyldy. 2022 jyly 138 mekteptiń qurylysyna bıýdjetten 104 mlrd teńge bólindi, onyń ishinde BQO-da alty mektepke 1,9 mlrd teńge bólindi. Odan bólek, 2022 jyly respýblıkada 1 000 mektep, onyń ishinde BQO-da 63 mektep jańǵyrtylady.
«Sonymen qatar oblys balabaqshalarynda 11 myńnan astam adam kezekte tur, alty apatty jáne úsh aýysymmen oqytatyn úsh mektep bar. Qosymsha bilim boıynsha memlekettik tapsyrysqa qarajat bólingen joq. Ákimdik bul problemalardy jedel sheshýi kerek. Jeke menshik balabaqshalar kóbirek ashylýy kerek. Memlekettik tapsyrys boıynsha qosymsha bilimge jergilikti bıýdjetten qarajat bólýdi qamtamasyz etý qajet», – dedi Úkimet basshysy.
Odan keıin Álıhan Smaıylov «Oral jylyjaı kesheni» JShS qyzmetimen tanysty, onyń jobalyq qýaty jylyna 3 myń tonna qııar men qyzanaqty quraıdy. Kásiporyn «QazAgro» UBH» AQ jelisi boıynsha 5 mlrd teńge memlekettik qoldaýdyń arqasynda iske qosyldy, nátıjesinde óńirde jylyjaı ónimderin óndirý eki esege artty.
«Kókónistermen qamtamasyz etý máselesinde jylyjaı keshenderi mańyzdy ról atqarady, sondyqtan biz olardyń sanyn arttyrýǵa múddelimiz. Bul úshin jylyjaı salýǵa jáne ony kútip-ustaýǵa ketetin shyǵyndardy sýbsıdııalaýǵa aıtarlyqtaı qarajat bólinedi. Bul jerde elimizdiń batysyndaǵy iri kásiporyndardyń biri Oral jylyjaı kombınaty jumysy mańyzdy ekenin ótkim keledi. Tek óz aımaǵymyzdyń ǵana emes, sonymen qatar kórshi aımaqtardyń naryǵyna shyǵý úshin de kúsh salý qajet. Bul baǵyttaǵy áleýet zor», – dep atap ótti Álıhan Smaıylov.
Odan keıin Premer-Mınıstr «Kvant» JShS jıhaz fabrıkasyna bardy, onyń ónimderi Qazaqstan ishinde de, syrtqy naryqta da, atap aıtqanda, Armenııa men Qyrǵyzstanda suranysqa ıe.
Memlekettik qoldaý aıasynda kásiporyn ınnovasııalyq jabdyqty satyp alý úshin jyldyq 6%-ben jeńildetilgen nesıe aldy. Bul fabrıkaǵa naryqtaǵy óz pozısııasyn bekitýge jáne óndiristi ulǵaıtýǵa múmkindik berdi.
«Ishki naryqtyń qajettiligi jyl saıyn ósip keledi, salany damytý úshin áleýet zor. «Qarapaıym zattar ekonomıkasy» baǵdarlamasy aıasynda kásipkerler jeńildikti qarjylandyrýǵa qol jetkize alady, sondyqtan otandyq jıhaz óndirýshileri bul múmkindikti belsendi paıdalanýy kerek», dedi QR Premer-Mınıstri.
