Qalamger qoldanǵan zattar qatarynda jýrnalıstıka qaıratkeriniń qyzmettik jáne otbasylyq estelikteri jınaqtalǵan foto-albom, «Qazaq jeriniń zııalylary» atty ensıklopedııasy men ulttyń únjarııasy, kostıým-shalbary men kóılegi, sómkesi, qalamsaby men kózildirigi, qoıyn dápterleri, «Beıimbet Maılın – 125 jyl», «Ilııas Jansúgirov – 125 jyl», «Áset Naımanbaıuly – 150 jyl» medaldary bar.
«Nurtileý Imanǵalıuly jarty ǵasyrǵa jýyq ǵumyryn jýrnalıstıka salasyna arnap, saýatty da salmaqty aqparat taratý jolynda shákirtterdiń bir býynyna mektep qalyptastyrdy. Nurtileý Imanǵalıuly eldiń azamaty, otbasynyń berik tiregi boldy, esimi tarıhta qaldy. Búgin ózi qoldanǵan zattarynyń bir bóligin Ulttyq mýzeıge tapsyryp, ol jaıly eskirmes estelikterdiń keıingi urpaq jadynda saqtalýyna atsalystyq dep oılaımyn. Eksponattar qatarynda efırge kıgen kıimderi de bar. Nurtileýdiń ózi aıtqandaı «patsha kóńildi kórermeni» endi Ulttyq mýzeıden tamashalaı alady. Sondaı-aq Nur-aǵanyń shyǵarmashylyǵy men jeke ómirin nasıhattaıtyn eń alǵashqy kórme de Ulttyq mýzeıden bastaý alǵaly jatyr. Bul bastamaǵa qoldaý bildirgen mýzeı basshylyǵyna aıryqsha alǵysymdy bildiremin. Kórme ári qaraı Almaty, Semeı, Shymkent jáne týǵan óńiri Taldyqorǵan qalasynda aıaqtalady», dedi Q. Sovetbekqyzy.
Qazaqtyń segiz qyrly bir syrly, ot tildi, oraq aýyzdy ustaz-jýrnalısi retinde este qalǵan Nurtileý Imanǵalıulynyń jubaıy Qarlyǵash Tabýldınova otaǵasynyń halqyn erekshe súıip, óz mamandyǵyn aıryqsha qurmettegenin de eske aldy.
«Nur-aǵa ultyn erekshe jaqsy kórdi, salt-dástúri men ádet-ǵurpyn aıryqsha baǵalady. Sodan bolar ulttyq kıimniń zamanaýı túrin habarlarǵa, efırge kıip nasıhattady. Sonymen qatar ol sportty da jaqsy kórdi. Jas kezinde bokspen aınalysyp, «Sport sheberine úmitker» ataǵyn aldy. Keıingi jyldary sýda júzý, voleıbol, bılıard oıyndarymen de aınalysty. Odan da alǵan kýbok, nagradalary kóp. Ol óz salasynyń kásibı mamany ǵana emes jan-jaqty bolǵandy, únemi izdenip, damyp otyrǵandy qalady. Nurtileýdiń qoǵamdaǵy, jeke ómirindegi barlyq qasıeti úlgi etýge laıyq bolsa, onyń dáleli jyly estelikter men artynda qalǵan muralary», dedi ol.
Nurtileý Imanǵalıuly Imanǵalıev 1952 jyly Almaty oblysy, Aqsý aýdany, Dińgek aýylynda dúnıege kelgen. Úıdegi 14 balanyń kenjesi. Atasy Qalıasqar bes jasynda saýatyn ashqan. 1977 jyly QazMÝ-di bitirgen soń Qazaq televızııasynda tilshi, redaktor, aǵa redaktor, kommentator, bas redaktor, saıası sholýshy, dırektordyń orynbasary, «Habar» agenttiginde moderator-júrgizýshi, odan keıin Úkimet keńsesinde sektor meńgerýshisi, Prezıdent Ákimshiliginde bas maman bolyp istegen. Korrýpsııaǵa qarsy kúres jónindegi memlekettik komıssııasynyń múshesi, «Qazaqstan» RTRK» AQ Basqarma Tóraǵasy qyzmetin atqarǵan.
Nurtileý Imanǵalıuly Qazaqstan Jýrnalıster odaǵy syılyǵynyń eki márte laýreaty, «Altyn Juldyz» syılyǵynyń ıegeri, QR mádenıetine eńbegi sińgen qaıratker, Qazaq Ulttyq О́ner akademııasynyń kurmetti professory, Aqsý aýdanynyń «Qurmetti Azamaty» atanǵan.
Aıta ketsek, Qazaqstan Respýblıkasy Ulttyq mýzeıi elimizdegi ulttyq muralary men mádenı qundylyqtaryn saqtaý men qorǵaýdyń biregeı ortalyǵy bolyp tabylady. Mýzeı qorynda paleontologııa, arheologııa, etnografııa, qarý-jaraq, nýmızmatıka, asyl metaldar men sándik-qoldanbaly óner jáne beıneleý óneri kolleksııalary, muraǵattyq foto, beıne jáne aýdıo qujattar bar. Qazirgi tańda mýzeı qorynda 217 286 jádiger saqtalǵan.
Sondaı-aq QR Ulttyq mýzeıinde 2022 jylǵy 28 sáýir kúni saǵat 16:00-de belgili qalamger Nurtileý Imanǵalıulynyń 70 jyldyǵyna arnalǵan «Baı-qýatty bolaıyq!» atty kórmesi ashylady. Kórmege Nurtileý Imanǵalıulynyń efırde kıgen ulttyq úlgidegi kıimderi, jeke qoljazbalary men jumys ústelindegi buıymdary, memlekettik jáne merekelik nagradalary, sporttyq kıimderi men qanjar, qamshy, dombyra syndy 200-ge tarta zattary qoıylady.
