«Kamal Smaıylov – ultymyzdyń rýhanııaty men mádenıeti úshin uly ister atqarǵan dara tulǵa. Búkil ǵumyryn týǵan halqyna qyzmet etýge arnaǵan aǵamyz qazaq ádebıeti men jýrnalıstıkasyn jáne kınosy men televızııasyn damytýǵa zor eńbek sińirdi. «Qazaqfılm» kınostýdııasyna basshylyq jasaǵan jyldarda ulttyq kıno ónerin buryn-sońdy bolmaǵan jańa bıikke kóterdi. Sol kezeńde «Qyz Jibek», «Atamannyń aqyry», «Taqııaly perishte» sııaqty kóptegen shedevr týyndylar dúnıege kelgeni belgili», deıdi Senat Spıkeri.
Kamal Seıitjanuly qandaı qyzmette bolsa da ultjandylyǵymen jáne tabandylyǵymen tanyldy. Memlekettik teleradıo komıtetiniń tóraǵasy bola júrip, qazaq tilindegi habarlardyń sanyn da, sapasyn da arttyrýǵa basa mán berdi. «Qymyzhana», «Tamasha», «Altybaqan», «Aıtys» sııaqty tól qundylyqtarymyzdy dáripteıtin jobalardyń júzege asýyna uıytqy boldy.
Kamal aǵanyń jetekshiligimen túsirilgen R.Qoshqarbaev, Q.Qaısenov, B.Momyshuly, M.Ǵabdýllın jáne taǵy basqa batyrlarymyz týraly derekti fılmder búginde qazaq televızııasynyń altyn qoryndaǵy qymbat qazynalardyń biri bolyp sanalady.
«Kamal Seıitjanuly Táýelsizdik alǵan tusta Joǵarǵy Keńes depýtaty retinde egemen elimizdiń eńse tikteýine de úlken úles qosty. Únemi eldik máselelerdi nazarda ustap, qaıratkerlik pikirin bildirip otyrdy. Sheraǵańmen jazysqan hattarynyń ózi halyq pen bılik arasyndaǵy altyn kópirdiń ozyq úlgisi ekeni sózsiz.
Aǵamyz ómiriniń sońyna deıin izinen ergen jas býynǵa jol kórsetip, shákirt tárbıeledi. Eli úshin eseli eńbek etken osyndaı eren tulǵanyń ónegeli ómirin keńinen dáripteý – barshamyzdyń azamattyq paryzymyz. Mundaı qadam jas býyndy otanshyl, ultjandy bolýǵa tárbıeleıtini anyq. Sondyqtan aldaǵy ýaqytta bul baǵytta ıgilikti ister kóptep qolǵa alynady dep senemiz. Kamal aǵamyzdyń rýhy shat bolsyn, murasy máńgi jasaı bersin!», dep jazdy Parlament Senatynyń Tóraǵasy facebook jelisindegi paraqshasynda.
