«Pandemııanyń eki jylynda medısınalyq qaýymdastyq tolyǵymen tótenshe jaǵdaıda jumys istedi. Vırýsty tolyqtaı jeńe almadyq, múmkin áli aıaqtalmaǵan da bolar. Biraq kadrlyq áleýetti ári qaraı damytatyn, barlyq deńgeıdegi medısınalyq kómektiń sapasyn jaqsartatyn, osy ýaqyt ishinde paıda bolǵan olqylyqtardy toqtatatyn ýaqyt keldi. Densaýlyq saqtaý salasynda negizgi, biraq sheshiletin problemalar bar. Olar kadr tapshylyǵy jáne ınfraqurylymdy jaqsartý qajettiligi», deıdi qalalyq densaýlyq saqtaý basqarmasynyń basshysy.
T.Muratovtyń málimetinshe, jaqyn arada kadr tapshylyǵyn azaıtý jáne densaýlyq saqtaý ınfraqurylymyn damytý boıynsha keshendi josparlar qabyldanatyn bolady. Búginde qala boıynsha dárigerlermen qamtylý 80%-dan aspaıdy, al tapshylyq 140 dárigerdi quraıdy.
Basqarma basshysy turǵyndar sany artyp kele jatqanyn eskere otyryp, kadrlarǵa aıryqsha qajettilik bar ekenin atap ótti. Búginde elordada bir jalpy praktıka dárigerine túsetin júkteme 1 604 adamdy quraıdy.
«Elordalyq medısına ınfraqurylymy qazirgi jaǵdaıǵa sáıkes bolýy kerek. Qala turǵyndary jyl saıyn ósip keledi, árbir turǵynǵa sapaly medısınalyq kómek kórsetilýge tıis. Pandemııa kezinde biz emhanalar men aýrýhanalardyń ǵımarattaryn kúrdeli jóndeýden nemese qaıta jóndeýden ótkize almadyq. Endi osy baǵytta jumystar júrgiziledi. 2018 jyldan bastap 2021 jylǵa deıingi kezeńde 20 mınýttyq qadamdyq qoljetimdilikti qamtamasyz etetin 40 dárigerlik ambýlatorııa nysany ashyldy. Bıyl taǵy 10 nysandy ashý josparlanyp otyr, olardyń ekeýi ashyldy», dedi elordanyń bas dárigeri.
Qalalyq densaýlyq saqtaý basqarmasynyń aqparaty boıynsha búginde 1 astanalyq emhananyń fılıaly, «Dostyq» dárigerlik ambýlatorııasy tolyq jóndeýden ótti, taǵy 8 MSAK uıymyna iri jóndeý jáne №1 qalalyq emhananyń eski ǵımaratyn qaıta jańǵyrtý júrip jatyr.
T.Muratov qazir elordalyq klınıkalarda medısınalyq jabdyqtardy jańǵyrtý júrgizilip jatqanyn atap ótti. Bıyl 54 tehnıka satyp alynǵanyn, onyń ishinde qalanyń bes emhanasyna arnalǵan kompıýterlik tomograftar baryn tilge tıek etti.
«2022 jyl Balalar jyly dep jarııalanǵany belgili. Endi barlyq kórsetkish boıynsha balalarǵa arnalǵan qyzmetti jáne bosandyrý qyzmetin jaqsartatyn bolamyz. Elordada tabıǵı týý kórsetkishi jylyna 30 myńnan asady. Bul da der kezinde áreket etýdi talap etetin óte joǵary kórsetkish. Balalar stasıonarlary men akýsherlik bloktardy jóndeý jumystary josparlanǵan. Sondaı-aq 2023 jyly 250 tósekke arnalǵan jańa akýsherlik korpýs salynady. Onyń jobalanýy aıaqtaldy», dedi T.Muratov.
Sonymen qatar ol qalanyń josparynda Internasıonalnyı eldi mekeninde bir aýysymda 150 adam qabyldaıtyn alǵashqy medısınalyq-sanıtarlyq kómek ortalyǵyn, О́ndiris eldi mekeninde bir aýysymda 250 adam qabyldaıtyn jańa ambýlatorııalyq-emhanalyq keshendi salý, №3 qalalyq emhanany ornalastyrý úshin ǵımarat satyp alý rásimi júrip jatqanyn aıtty.
