Áıelder kúresinen jarys aınalma júıe boıynsha ótkendikten, 68 kılo salmaqtaǵy Mádına Baqbergenovaǵa Tokıo Olımpıadasy men Azııa oıyndarynyń qola júldegeri, byltyrǵy álem jáne qurlyq chempıony Meırım Jýmanazarovamen eki ret kúsh synasýǵa týra keldi. Alǵashqy aınalymda qyrǵyz qyzy 5:0 esebimen jeńiske jetti. Odan keıin eki básekede aıqyn basymdyq tanytqan qos myqty aqtyq aıqasta qaıta jolyqty. Bul joly Baqbergenova tabandylyq tanytyp, jeńisti áıgili qarsylasynyń ýysynan sońǵy sekýndtarda julyp áketti – 3:2. Sóıtip, Azııa chempıonattarynda osyǵan deıingi eki ret júldegerler sanatynan kóringen Mádına bul joly altynnan alqa taqty.
Fınaldyq saıys aıaqtalǵan bette: «Eki apta boıy biz Mońǵolııada oqý-jattyǵý jıynyn ótkizdik. Bapkerlermen birge osy jerde ár qarsylasymyzdy ábden zerttep, olarǵa qandaı ádis-tásil qoldanatynymyzdy jaqsylap turyp pysyqtadyq. Nátıjesinde, ustanǵan taktıkamyz óz jemisin berip, kózdegen maqsatyma qol jetkizdim. Biraq bul tabysqa toqmeıilsýge bolmaıdy. Alda bizdi kóptegen baıraqty báseke kútip tur. Sonyń barlyǵyna durystap daıarlanýmyz kerek», dedi M.Baqbergenova.
Qazaqstan quramasynyń qorjynyndaǵy Azııa chempıonatynyń ekinshi altyny da Baqbergenovter áýletiniń enshisinde. Mádınanyń syńary Jámılanyń esimi de jankúıerlerge jaqsy tanys. Ol – 2019 jyly Nıý-Delıde Azııa chempıony atanyp, 2021 jyly Oslodaǵy álem chempıonatynda kúmis medaldy moınyna ilgen elimizdegi eń beldi balýandardyń biri. Desek te oǵan Ulanbatyrda jeńis tuǵyryna kóterilý ońaı bolmady. Qazaq qyzy úndistandyq Nıkkı Nıkkı jáne ózbekstandyq Svetlana Oknazarovany oısyrata utqanymen, mońǵolııalyq Daavanasan Enh Amar men úndistandyq Sýmıre Nııkýraǵa qarsy biraz ter tógýine týra keldi. Bul beldesýlerdiń ekeýinde de teń esep tirkeldi. Desek te birde kesek ádis jasap, endi birde sońǵy upaıdy enshilegen Mádınanyń mysy basym bolyp, ol da altynnan alqa taqty. Sóıtip, Almaty oblysynyń Jambyl aýdanyna qarasty Qaraqastek aýylynyń turǵyndary Naýqannur men Gúlmıranyń qyzdary Azııa chempıony atanyp, kúlli Alash jurtyn qýantty.
Eń aýyr salmaqta kúresken Gúlmaral Erkebaeva mońǵol jáne ózbek sportshylaryn esh qınalmaı utqanymen, Azııa chempıony, jastar arasyndaǵy (U-23) álem birinshiligi men jasóspirimderdiń Dúnıejúzilik Olımpıadasynyń qola júldegeri japonııalyq Iýka Kagamıge áli jetpedi. Úshinshi oryn úshin saıysta Gúlmaral mońǵolııalyq Aıýnjargal Ganbattan aılasyn asyrdy. 53 kılo salmaq dárejesindegi Juldyz Eshimova da dál sondaı jolmen ótip, qola medal úshin básekede ózbekstandyq Aqteńge Keýnımjaevany qapy qaldyrdy. Bir ǵajaby, sonaý 2007 jyly otandasymyzdyń alǵash ret sary qurlyqtyń teńdessizi atanǵany esimizde. Ol kezde Juldyz nebári 19 jasta edi. Mine, endi arada 15 jyl ótken soń Eshimova qaıta sol belesten kórindi. Sol aralyqta Juldyz qurlyq birinshiliginde alty ret júldegerler qatarynan kórinip, álem chempıonaty men Azııa oıyndarynda kúmis pen qola medaldardy enshilegenin de aıta ketýge tıispiz.
О́kinishke qaraı, Aıgúl Nurálim (50 kılo), Altyn Shaǵaeva (55 kılo), Nýlıfar Raımova (57 kılo), Dıana Qaıýmova (59 kılo), Aıaýlym Qasymova (62 kılo) jáne Darııa Áben (65 kılo) bul jarysta bilgenderinen jańylyp, úzdikter sanatyna qosyla almady.
Osylaısha, áıelder kúresinen ótken jarysta 10 bas júldesiniń jeteýin japon balýandary oljalady. Árıne, oǵan tańdanýǵa bolmaıdy. О́ıtkeni Kúnshyǵys eliniń qyzdary tek Azııada ǵana emes, kúlli álemde eń úzdik komandalar sanatynda. Eki altyndy qazaq qyzdary ıelense, qyrǵyz qyzy bir márte top jardy. Al ózge memlekettiń ókilderi tek kúmis pen qola medaldardy qanaǵat tutty.
Senbi kúni erkin kúres sheberleri jarys jolyna shyqty. 57 kılo salmaqtaǵy Rahat Qaljan sırııalyq Ekanaıaka Mýdııanselage Gaıan Katýrangany (10:0), ózbekstandyq Gýlomjon Abdýllaevty (6:1) jáne qyrǵyzstandyq Almas Smanbekovti (6:5) san soqtyryp, fınalda Tokıo Olımpıadasynyń kúmis jáne Nur-Sultandaǵy álem chempıonatynyń qola júldegeri, úndistandyq Kýmar Ravımen kúsh synasty. Rahattyń áıgili qarsylasyna áli jetpedi – 2:12. Qaljan kúmis medaldy ıelense, Kýmar qatarynan úshinshi ret Azııanyń teńdessizi dep tanyldy.
70 kılo salmaqta kúresken Syrbaz Talǵat byltyr Almatyda ótken sary qurlyqtyń basty dodasynda qarsylas shydatpaı, bas júldeni oljalaǵan edi. Ulanbatyrda da biz jas jolbarystan dál sondaı erlik kúttik. Biraq Syrbaz japonııalyq Taıshı Narıkýnıdiń osal tusyn taba almady. Desek te úshinshi oryn úshin tartysta namysqa tyrysqan qazaq balýany Parsy eliniń ókili Mýhammadmendı Iаgenenjafarıdi jeńdi – 4:0. 97 kılo salmaqtaǵy Mamed Ibragımov ta qola medaldy enshiledi. Sheshýshi tusta ol ózbekstandyq Magomedrasýl Rahımovtan basym tústi.
65 kılo salmaqtaǵy Sanjar Dosjanov tusaýkeser kezdesýinde Sogbabrah Sevensýrennen oısyraı utylyp, jarysty merziminen buryn aıaqtady. Sol sekildi 79 kılodaǵy Jiger Zákirovtiń de joly bolmady. Ol japonııalyq Iýdaı Takahashıge jol berdi. Osylaısha, erkin kúres sheberleri alǵashqy jarys kúnin 1 kúmis jáne 2 qola medalmen qorytyndylady.
