Búgin Baǵdat Mýsın Halyqaralyq Túrki akademııasynyń prezıdenti, «Egemen Qazaqstan» AQ basqarma tóraǵasy Darhan Qydyráli jáne Túrki akademııasynyń vıse-prezıdenti Fızýlı Madjıdlımen kezdesti. Kezdesý barysynda túrki áleminiń ınternettegi ıdentıfıkasııasy týraly áńgime qozǵaldy.
Keıin mınıstr áńgime barysynda talqylanǵan birneshe máseleni kópshiliktiń nazaryna usyndy.
«Birinshiden, Túrki álemi murasynyń qory – «Atalar mırasy» portalynyń aıasyn keńeıtý. Qazaq, túrik, aǵylshyn jáne orys tilderinde málimet beretin portalda túrkitildes halyqtardyń, ulystar men etnıkalyq toptardyń ejelgi zamannan búginge deıingi rýhanı muralary toptastyrylǵan.
Ekinshiden, Túrki áleminiń ensıklopedııasyn jasaý. Tarıhy tereńde jatqan kóne túrkiniń derekter bazasy qomaqty bolary sózsiz. Bul oraıda «Túrkistan ensıklopedııasynyń» 3 tomdyǵy bar jáne túrkitildes elderdiń ortaq ensıklopedııasyn jasaý osy eńbektiń negizinde jalǵasatyn bolady.
Úshinshiden, Túrki álemindegi ǵylymı jumystardyń sıfrlyq nusqasyn jasaý. Bul oraıda, rasymen, qazirgi ýaqytta túrkitildes halyqtardyń ǵylymı zertteýleriniń ortaq qory joq. Nátıjesinde, ǵylym áleminde jıi kezdesetin plagıat problemasy da órship turǵany belgili. Sondyqtan ǵylymı dıssertasııalar men arhıvterdi sıfrlandyrý prosesine túrkitildes elderdi jumyldyryp, ortaq maqsattaǵy jobaǵa aınaldyrsaq, jaqsy bolar edi.
Árıne, Sıfrlyq damý, ınnovasııalar jáne aeroǵarysh ónerkásibi mınıstrligi túbi bir túrki halyqtarynyń birligin bekem eter bastamalardy qoldaıdy jáne Túrki akademııasymen bul baǵyttaǵy yntymaqtastyqty nyǵaıtamyz. Sebebi tarıhymyzdy túgendep, eldigimizdi eńseli etip, rýhanı muramyzdy óskeleń urpaqqa tabystaý – árbirimizdiń azamattyq paryzymyz», dep jazdy mınıstr áleýmettik jelide.
