«Jalǵan memlekettik nómirlerdi paıdalanatyn, kólikterge arnaıy belgi berý qurylǵylaryn ornatqan kólik júrgizýshilerin, sondaı-aq kólik quraldaryn mas kúıinde basqarǵan adamdardy jaýapkershilikke tartý boıynsha maqsatty jumystar jalǵasýda. Aıtpaqshy, ótken táýlikte ǵana qala joldaryndaǵy «Qorǵaý Sergek» kesheni jalǵan nómir paıdalanǵan 11 júrgizýshini anyqtady. О́tken táýlikte olar jalpy somasy 12 mıllıon 680 teńgeni quraıtyn 790 quqyq buzýshylyq jasaǵan. Bul kólikter ustalyp, arnaıy aıyppul turaǵyna ornalastyryldy», dedi, Almaty qalalyq PD jergilikti polısııa qyzmeti Basqarmasynyń bastyǵy, polısııa polkovnıgi Manap Sattarov.
Aıyppul salynǵandar arasynda – 1992 jyly týǵan A.esimdi azamat bar. Jaqynda ol 92 ret jol qozǵalysy erejesin buzǵan. Aıyppul somasy 1 mıllıon 541 myń teńgeni qurady.
«Aıta keteıik, «Qorǵaý Sergek» júıesi 2021 jyldyń qarasha aıynan bastap pılottyq rejımde qoldanylyp keledi. Jalpy, jyl basynan beri jalǵan memlekettik nómir paıdalanǵany úshin (QR ÁQbK-niń 590-baby 3,4 bóligi) 171 júrgizýshi ustalyp, ákimshilik jaýapkershilikke tartyldy. Kólikter aıyppul turaǵyna ornatyldy. Sonymen qatar, ótken táýlikte arnaıy jaryq-dybys jáne daýysty sıgnaldardy zańsyz paıdalanǵan eki kólik júrgizýshileri ustaldy. Sondaı-aq, 7 mas júrgizýshi kólikti basqarýdan shettetildi», dedi, polkovnık Sattarov.
