«Ulttyq aqparattyq tehnologııalar» AQ qoǵammen baılanys basqarmasynyń málimetinshe, prosesti qaıta qaraýdyń arqasynda jeti áleýmettik tólem alý yńǵaıly ári jeńildeı tústi. Elektrondyq úkimet portalynda úsh banktiń arnaıy shottary avtomatty túrde ashylady.
«Endi eGov.kz portalynda áleýmettik tólemderdi, járdemaqylardy jáne zeınetaqylardy rásimdeý úshin ótinish bergen kezde 20 tańbaly shot nómirin (IBAN) qolmen engizýdiń qajeti joq. Júıe qoljetimdi shottardy ótinish berýshiniń JSN-i boıynsha alady, bul óz kezeginde shot nómirin qate engizýge jol bermeıdi. Járdemaqy alý úshin arnaıy shotty elimizdiń úsh bankinde ashýǵa bolady: Halyk Bank, Kaspi.kz jáne «Bank SentrKredıt» AQ», delingen habarlamada.
Bul fýnksııa Eńbek jáne halyqty áleýmettik qorǵaý mınıstrliginiń kelesi áleýmettik memlekettik qyzmetterinde qoljetimdi: bala týýǵa jáne bala kútimine baılanysty járdemaqy taǵaıyndaý; múgedek balany tárbıelep otyrǵan anasyna nemese ákesine, asyrap alýshyǵa járdemaqy taǵaıyndaý; múgedektik boıynsha memlekettik áleýmettik járdemaqylardy taǵaıyndaý; asyraýshysynan aıyrylý jaǵdaıy boıynsha memlekettik áleýmettik járdemaqylar taǵaıyndaý; jerleýge arnalǵan birjolǵy tólemdi taǵaıyndaý; kóp balaly otbasyǵa memlekettik járdemaqy taǵaıyndaý; memlekettik bazalyq zeınetaqy tólemin taǵaıyndaý.
«Buryn jeńildikter men tólemderge ótinish bergende shot nómirin qolmen engizý qajet bolatyn, paıdalanýshylar shot nómirin engizý kezinde jıi qatelesetin. Endi qajetti bankti durys tańdaǵan jaǵdaıda, shot avtomatty túrde paıda bolady. Eger shotyńyz joq bolsa, onda qyzmetti alý kezinde ashýǵa bolady. Jańa fýnksııa ýaqytty únemdeıdi jáne áleýmettik tólemder men járdemaqylardy óńdeý prosesin aıtarlyqtaı jeńildetedi», dep túsindirdi vedomstvodan.
