Mınıstr óz sózinde óńirlik rektorlar keńesin damytýǵa, stýdentter men oqytýshylardyń akademııalyq utqyrlyǵyn jetildirýge, mamandyqtardy beıimdeýge qatysty birqatar tapsyrma berdi.
Otyrys barysynda Rektorlar keńesiniń tóraǵasy Erlan Sydyqov ótken jylǵy qyzmet jáne bıylǵy jumys josparlary týraly habardar etti. Onyń sózine súıensek, 7 óńirlik rektorlar keńesi qurylyp, Almaty men Nur-Sultan qalalarynda jáne 5 óńirde onyń otyrystary ótedi. Halyqaralyq yntymaqtastyq oń jolǵa qoıyldy. Ýkraına joǵary oqý oryndary rektorlarynyń keńesimen, Qyrǵyzstan joǵary oqý oryndary qaýymdastyǵymen kelisimderge qol qoıyldy jáne RF, Ázirbaıjan, О́zbekstan, Vengrııa, Túrkııa rektorlarynyń keńesterimen de yntymaqtastyq týraly qujatqa qol qoıý josparlanýda.
Rektorlar keńesi qazaqstandyq JOO-nyń QS halyqaralyq reıtıngsinide qatysýyn keńeıtý jumystaryn júrgizýde. Orta Azııa memleketterindegi JOO rektorlarynyń birlesken qyzmeti týraly kelisimge qol jetkizildi.
«Halyq únine qulaq asatyn memleket» qaǵıdasyn júzege asyrý baǵytynda biryńǵaı aqparattyq-taldaý alańy retinde Qazaqstan JOO konsorsıýmyn qurý máselesi talqylanýda. Jıyn barysynda Rektorlar keńesiniń bıylǵy jumys josparynyń basty baǵyttary qarastyryldy. Oqý úrdisin jańǵyrtý jáne JOO ǵylymyn damytý máselelerine basymdyq berilmek. Skolkovo joǵary basqarý mektebimen birlese joǵary bilim salasynda basqarýshy-menedjerlerdi daıarlaý boıynsha arnaıy baǵdarlama ázirlendi.
Elimizdegi eń úzdik salalyq ortalyqtarda jas mamandar men stýdentterdi taǵylymdamadan ótkizý boıynsha «Tálimger» baǵdarlamasy qolǵa alynbaq.
Erlan Sydyqovtyń aıtýynsha, Ahmet Baıtursynulynyń týǵanyna 150 jyl tolýyna baılanysty Qazaqstanda «Ahmet Baıtursynuly jáne Alash qundylyqtary» taqyrybynda jalpyrespýblıkalyq dıktant ótedi.
Keńestiń taǵy bir bastamasy – joǵary oqý oryndarynyń qyzmetin sıfrlandyrýdyń ýnıversıtettik algorıtmin engizý, bul el ýnıversıtetteriniń barlyq qyzmetin tolyqqandy sıfrlandyrýǵa kóshýdiń biryńǵaı platformasyn qalyptastyrýǵa múmkindik beredi.
Basqosý sońynda rektorlar keńesiniń sheshimimen hımııa ǵylymdarynyń doktory, professor, QR UǴA akademıgi Erejep Mámbetqazıevke jáne bıologııa ǵylymdarynyń doktory, professor Jasulan Shaımardanovqa «Qazaqstan Respýblıkasynyń Qurmetti rektory» ataǵy berildi.
Aıta ketsek, Qazaqstan Respýblıkasy Joǵary oqý oryndary rektorlarynyń keńesi 2015 jylǵy mamyrda quryldy. Onyń maqsaty – joǵary jáne joǵary oqý ornynan keıingi bilim berýdi damytý máseleleri boıynsha joǵary oqý oryndarynyń qyzmetin úılestirý, bilim berý prosesterin uıymdastyrý boıynsha oń tájirıbeni jınaqtaý jáne taratý, joǵary bilim berý júıesin jetildirý.