Sýretti túsirgen J.Jumabekov
Jıyn barysynda Erlan Qoshanov Fraksııa múshelerine Prezıdent Qasym-Jomart Kemeluly Toqaevtyń QHA sessııasy barysynda Konstıtýsııaǵa ózgerister engizý boıynsha búkilhalyqtyq referendým ótkizý týraly bastamasynyń mańyzdylyǵyna erekshe nazar aýdardy.
– Bul jan-jaqty saralanǵan tarıhı sheshim. Biz memleket qurýdyń jańa kezeńine aıaq basqaly turmyz. Ol – azamatardyń saıasatqa aralasý múmkindigin keńeıtýge baǵyttalǵan elimizdiń qoǵamdyq-saıası júıesiniń transformasııasy. Aldaǵy ózgeristerdiń aýqymyn eskere otyryp, oǵan kúlli halyqtyń qatysýy óte mańyzdy. Sondyqtan Memleket basshysy referendým ótkizýdi usyndy, – dedi Erlan Qoshanov.
Májilis Tóraǵasy atap ótkendeı, Qazaqstan memleket pen qoǵamnyń ózara is-qımylynyń jańa modeline kóshýde. Ol ózgeristerdiń aýqymy eskerile otyryp, «Ekinshi respýblıka» dep ataldy.
E.Qoshanov Májilis depýtattaryna da zor jaýapkershilik júktelip otyrǵanyn aıtyp, olardyń túsindirý jumystaryna qatysýy mańyzdy ekenin atap ótti.
– Bizdiń mindetimiz – Memleket basshysy usynǵan saıası reformalardy halyqqa durys jetkizý, – dedi palata Tóraǵasy.
Sonymen qatar Erlan Qoshanov Májilis depýtattaryna óńirlerdegi túrli dıalog alańdarynda, eńbek ujymdarynda jáne dárigerler, muǵalimder, jastar, qoǵamdyq kóshbasshylarmen, sondaı-aq ǵylymı-sarapshylyq orta ókilderimen kezdesýler ótkizýdiń qajettigine nazar aýdardy. Sondaı-aq barlyq reformalardyń qoǵam men árbir azamat úshin mańyzyn qarapaıym tilmen jetkizýge tıis ekenin atap ótti.
Bul rette Májilis Spıkeri depýtattardyń sapary qalalar men aýdandarǵa ǵana emes, sondaı-aq ártúrli sanattaǵy azamattardy barynsha qamtı otyryp, shalǵaı eldi mekenderge shyǵýyn uıymdastyrýdy tapsyrdy.
