Eń bastysy – Konstıtýsııaǵa engiziletin ózgerister halyq talqysyna shyǵarylady jáne azamattarymyzdyń sheshimimen qabyldanady.
Prezıdentimiz jumys toby Ata Zańymyzdyń 33 babyna ózgeris engizýdi usynǵany týraly aıtty. Bul Konstıtýsııanyń úshten bir bóligi degen sóz. Sondyqtan ózgerister – aýqymdy ári mańyzdy. Osyny eskere otyryp, Memleket basshysy respýblıkalyq referendým ótkizýdi usyndy.
Bul – aıtýly saıası oqıǵa deýge tolyq negiz bar. Sebebi mundaı referendým osydan 27 jyl buryn ótkizilgen edi. Ol kezde de qoldanystaǵy Ata Zańymyz qabyldanǵan bolatyn. Sodan bergi ózgerister Parlamenttiń qatysýymen ǵana júzege asyrylyp kelgeni belgili.
Jańa Qazaqstanda qoǵamnyń pikiri – aldyńǵy orynda. Prezıdentimiz óziniń osy bastamasy arqyly azamattardy el ómirine belsene aralasýǵa shaqyryp otyr. Qasym-Jomart Kemelulynyń, referendým árbir azamattyń eldiń taǵdyryn aıqyndaýǵa tikeleı qatysý múmkindigi degeni sondyqtan. Bul qadam, bir jaǵynan, bılik pen qoǵamnyń arasyndaǵy álsiregen senimdi nyǵaıtýǵa da oń yqpalyn tıgizetini anyq.
Elimiz qańtar oqıǵasyn basynan ótkerdi. Geosaıası ahýal da shıelenisip tur. Mine, osyndaı qıyndyqtarǵa qaramastan, Memleket basshysy Qazaqstandy demokratııalyq qundylyqtar negizinde nyǵaıtýǵa mán berip otyr. Prezıdentimizdiń tikeleı bastamasymen qolǵa alynǵan reformalardyń deni saıası transformasııany kózdeıdi. Konstıtýsııalyq ózgeristerdi tutas ulttyń talqysyna salý bastamasyn da demokratııaǵa negizdelgen saıası jańarýdyń belgisi dep qabyldaımyn.
Beıbit ISABAEV,
Senat depýtaty
