Birinshi jáne eń bastysy, bul etnosaralyq kelisimdi nyǵaıtý jónindegi jumys. Bizdiń birligimiz – áralýandylyqta. Jalpyulttyq qundylyqtar qashanda aldyńǵy qatarǵa shyǵady. Biz Assambleıaǵa qatysty aıtylǵan syn týraly bilemiz. Ol birde ádil aıtylyp, onymen kelisemiz. Biraq, aıta keterlik jaıt, kóp nárse PR úshin jasalmaıdy. Búginde Assambleıa kúrdeli synaqtan ótti dep senimmen aıta alamyn. Etnomádenı birlestikterdiń myńdaǵan kóshbasshysy men medıatory qıyn sátterde halyqpen jumys istep, janjaldardyń aldyn alýǵa tyrysady, syndarly dıalog júrgizedi. Halyqtyń danalyǵy eń qıyn kezderde bilinedi. Etnosaralyq qatynastar salasynyń názik jáne shekten shyǵýy ońaı ekenin bárimiz de bilemiz. Degenmen Qazaqstanda etnosaralyq qaqtyǵystar joq ekenin atap ótýim kerek. Eldiń myzǵymas shekarasy bar. Biz ózimizdi táýelsiz Qazaqstannan tys elestete almaımyz. Keıbir arandatýshylar kúndelikti janjaldardy paıdakúnemdik maqsatta paıdalanady. Bul rette Assambleıanyń ádettegi qarapaıymdylyǵy múldem orynsyz dep sanaımyn. Muny túzetýimiz kerek.
Jumystardyń taǵy bir belsendi bóligi – halyqtyń áleýmettik osal toptaryn qoldaý. 2021 jyldan bastap osy kúnge deıin 150 myńnan astam azamatqa 1,3 mlrd teńgeden astam somaǵa kómek kórsetildi. Buǵan shamamen 13 myń adamnan turatyn Analar keńesi kómektesti. Bul baǵyttaǵy jumys Prezıdenttiń bastamasymen qurylǵan «Qazaqstan halqyna» qorynyń mańyzdylyǵy men ózektiligin kórsetedi.
Úshinshi baǵyt – búginde elimiz úshin asa qajetti progressıvti reformalardy qoǵamdyq qoldaý. Árbir etnoortalyq bir maqsatpen biriktirilgen azamattar qaýymdastyǵy bolyp sanalady. Biz ózimizdiń tarıhı tamyrymyzdy turaqty ári gúldengen Qazaqstanda ǵana saqtap qalýǵa bolatynyn túsinemiz. Sondyqtan, eń aldymen, el birligine qamqorlyq jasaýymyz kerek. Jaqynda 200-den astam kásipker qatysqan QHA Kásipkerler qaýymdastyǵynyń jınalysynda barlyǵy tarıhı shyǵý tegi bar elderdiń seriktesterimen birlesken kásiporyndardy damytý jónindegi usynysty qoldady. Atap aıtqanda, koreıler qaýymdastyǵynda jańa tehnologııalardy tartý boıynsha Ońtústik Koreıamen jumys isteıtin «Investıks» kompanııasy quryldy. Assambleıada áleýmettik mańyzy bar halyq jobalaryn ázirleýge kómektesetin jobalyq keńse qurýdy usynamyn. Qazir biz qoǵamymyzdyń qalaı jandanǵanyn, jańa odaqtar men birlestikterdiń paıda bolǵanyn kórip otyrmyz. Bul óte jaqsy. Memleket azamattardyń belsendiligi men jaqsy ómirge degen umtylysyn qoldaıdy. Naqty baǵdarlamalar bar. Árqaısymyzdyń qasıetti mindetimiz – osy taǵdyrly proseske óz úlesimizdi qosý. Qaı jerde jumys istesek te, etnostyq shyǵý tegine qaramastan, bárimiz de Uly dala balasy, Qazaqstan azamattarymyz. Biz jáne bizdiń urpaqtarymyz osynda turady.
Jańa Qazaqstandy qurýda alǵa qoıylǵan maqsat saıası ınnovasııalardyń, azamattyq bastamanyń jáne kásipkerlik energııanyń sınergııasyn talap etedi. Sondyqtan barlyǵyńyzdy sózden iske kóship, jańa reformalar beretin múmkindikti paıdalanýǵa shaqyramyn.
Sergeı OGAI,
Qazaqstan koreıleri qaýymdastyǵynyń basshysy
