Káýsar úndi ánshi

Álemdik opera juldyzdarynyń biri Marııa Kallastyń: «Ánshi – máńgi stýdent, ónerin damytý úshin ol únemi izdeniste júredi» degen sózi bar eken. Qazaqstannyń eńbek sińirgen ártisi, Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń ánshisi Jumaǵanym Rahımova osy oıly tirkesti únemi ustanatynyn baıqap júremiz. «Ustazy jaqsynyń – ustamy jaqsy» degendeı, Jumaǵanymnyń óner joly men án ólkesinde oǵan jaqsy ustazdar kezikti. Bul rette eń aldymen ol úshin Bıbigúl Tólegenovanyń orny bólek. Án rejıssýrasynyń ishki ıirimderin jáne án salý mádenıetiniń qaıtalanbas zańdylyqtary men erekshelikterin J.Rahımova birinshi kezekte qazaq án óneriniń búgingi korıfeıinen úırengenin árkez maqtan tutady. Sondaı-aq, Italııa án mektebiniń qabyrǵaly ókili Aleksandr Kýrganov pen vokal boıynsha Ortalyq Azııadaǵy tuńǵysh professor Beken Jylysbaevtyń onyń án kógine qanattanyp ushýyna qosqan úlesteri mol. Jumaǵanym Rahımovanyń esimi elimizdegi barsha ánsúıer qaýymǵa tanymal. «Otyrar sazy» folklorlyq-etnografııalyq orkestrinde qyzmet jasaǵan jyldaryn ol aıryqsha tolqynyspen eske alyp júredi. Ataǵy alysqa ketken osy orkestrdiń quramynda júrip, bizdiń búgingi keıipkerimiz elge keńinen tanyldy. Ári ekiniń biriniń júregi daýalaı bermeıtin Latıf Hamıdıdiń «Bulbul» jáne «Qazaq valsi» ánderi onyń júregine qashanda jaqyn. Bul kúrdeli shyǵarmalar qazaq án óneriniń jaryq juldyzdary Kúlásh Baıseıitova men Bıbigúl Tólegenovanyń repertýarynan turaqty oryn alyp kelgenin eskersek, Jumaǵanym Rahımovanyń tastaı táýekeldigi men batyldyǵy, kásibı án shyrqaý sheberligi aıqyndala túsedi. Sondaı-aq, onyń án padıshalaryna jalań eliktep-solyqtamaı ózine tán án aıtý máneri men mashyǵyn taba bilgeni de atap aıtýǵa turarlyq. Ol úshin «Qyz Jibek», «Birjan-Sara» ope­rasyndaǵy Qyz Jibek pen Saranyń arııalary aıryqsha ystyq. Sondaı-aq, qazaqtyń ónerli qyzy Úkili Ybyraıdyń «Gákkýi» men álemdik mýzykadan A.Alıabevtiń «Soloveıin» tamyljyta shyrqaǵan kezde de ózinen-ózi bıiktep, ózin-ózi umytyp, qalqyp, qanattanyp, qulpyryp sala beredi. Maqsatkerlik – qaı kezde de keshtik etpeıtin, toldym, tolystym deıtin jyldarmen birge keletin keleńsiz keýdemsoqtyq dertinen saqtap otyratyn adam boıyndaǵy aıryqsha qasıettiń biri. Osyndaı bitim-bolmys birneshe dúrkin halyqaralyq mýzyka festıvaldarynyń laýreaty, respýblıkalyq teleradıokompanııanyń altyn qoryna júzden astam halyq ánderi men qazaq jáne shetel kompozıtorlarynyń shyǵarmalaryn jazdyrǵan óner sheberi J.Rahımovaǵa da tán desek qatelespeımiz. – Aıtalyq, Italııanyń árbir qalasynda kem degende eki-úsh opera teatry bar. Qazirgi maqsatym klassıkalyq án qaınary kemeldengen sol elge baryp ánshilerdi tyńdaý, olardyń qandaı jumys isteıtinin kórý bolyp otyr. Konservatorııany aıaqtaǵan kezde dıplomdyq jumysym Pýchchınıdiń «Chıo-Chıo-San» operasyndaǵy Batterflıaıdyń obrazy bolǵan edi. Osy aıshyqty da bederli beıne ómi­­rim men ónerimde óshpesteı iz qaldyrdy. Stý­denttik shaqtaǵy jarqyn sátter esh ýaqytta umytylmaıdy. Sodan ba eken Batterflıaı beıne bir ómir boıy menimen birge qatar júrip kele jatqandaı kóńil-kúıge beriletin sátterim az emes. Ulym Aspandııar men qyzym Aqbotany ertip sol jaqqa bir baryp qaıtqym keledi de tura­dy. Bul qadamyma balalarymnyń ákesi, mar­qum, ómir men ónerdegi serigim bolǵan qazaqtyń daryndy uldarynyń biri, ánshi-kompozıtor Áshir Moldaǵaıynovtyń rýhy da rıza bolatyn shyǵar dep oılaımyn, – deıdi belgili ánshi. Iá, Jumaǵanym Rahımovanyń káýsar kóńilden shyrqata, tamyljyta ári áýelete salǵan ánderi qaı kezde de tyńdaýshysynyń qulaq quryshyn qandyra alady. Ánshi baqyty degenimiz de múmkin osy shyǵar. Temir QUSAIYN, «Egemen Qazaqstan». ORAL. –––––––––––––– Sýrette: Qazaqstannyń eńbek sińirgen ártisi, ánshi Jumaǵanym Rahımova.