Memleket basshysy Bahreın Korolimen kezdesti

Búgin, 14 sáýir kúni Memleket basshysy Nursultan Nazarbaev elimizge resmı saparmen kelgen Bahreın Koroli Hamad ben Isa Ál-Halıfamen kezdesti. Bul týraly Aqorda saıty habarlady. «Shaǵyn quramdaǵy kezdesý barysynda saýda-ekonomıka, qarjy-ınvestısııa, kólik-kommýnıkasııa jáne aýyl sharýashylyǵy salalaryndaǵy eki jaqty yntymaqtastyqty jandandyrý máseleleri talqylandy. Kezdesý kezendi Memleket basshylary eki eldiń ártúrli óńirlik jáne halyqaralyq uıymdar aıasyndaǵy ózara is-qımylyna kóńil bólip, halyqaralyq kún tártibiniń ózekti máseleleri jóninde de pikir almasty», - delingen habarlamada. Qazaqstan Prezıdenti Bahreın Koroliniń alǵashqy resmı sapary ekijaqty qarym-qatynastardy nyǵaıtýǵa óz úlesin qosatynyna senim bildirdi. – Men 1997  jyly Bahreınge saparym barysynda Sizdiń ákeńiz Isa ıbn Salman Ál-Halıfamen jemisti kelissózder ótkizdim. Sizdiń óńirde de, bizdiń  óńirde de túrli ózgerister bolyp jatyr. Saýda-ekonomıkalyq yntymaqtastyqtyń mańyzdy máselelerin talqylaý jáne birlesken bıznes-forým ótkizý bizdiń qarym-qatynastarymyzǵa oń áser etetinine senimdimin, – dedi Nursultan Nazarbaev. Sóz kezeginde Hamad ben Isa Ál-Halıfa Qazaqstannyń Bahreınmen jáne jalpy Parsy túbegi óńirimen yntymaqtastyǵy artyp kele jatqanyn aıta kelip, elimizge kelýge jasalǵan shaqyrtýǵa jáne kórsetilgen qonaqjaılyqqa rızashylyǵyn bildirdi. Keńeıtilgen quramdaǵy kezdesýde Nursultan Nazarbaev eki eldiń arasyndaǵy qatynastardy jańa deńgeıge shyǵarý úshin taraptardyń kúsh-jiger jumyldyratynyn atap ótti. – Sizben birge Astanaǵa kelgen úlken delegasııa bizdiń elmen yntymaqtastyqtyń bolashaǵyna senimdilikti kórsetedi. Qazaqstan Bahreın Koroldigin Parsy túbegi elderiniń ishindegi mańyzdy áriptesteriniń biri sanaıdy. Biz ekonomıkalyq áleýetimizdi júzege asyrý úshin bar kúsh-jigerimizdi jumsaıtynymyzǵa senimdimin. Bizdiń elderimizge ortaq nárseler kóp. Eki eldiń de Táýelsizdik kúni 16 jeltoqsan ekeni atap óterlik, – dedi Qazaqstan Prezıdenti. Memleket basshysy Bahreınniń tarıhı turǵydan qysqa merzimniń ishinde ındýstrııalyq damyǵan jetekshi eldiń birine aınalǵandyǵyna nazar aýdardy. – Bul jetistik Sizdiń halyq aldyndaǵy  zor jeke eńbegińiz bolyp tabylady. Koroldik musylman álemindegi iri qarjy jáne ıslamdyq bankıng ortalyǵyna aınaldy. Qazaqstan da Táýelsizdiktiń barlyq kezeńinde joǵary qarqynmen damyp keledi. Mysaly, 1992 jyly eldiń ishki jalpy ónimi nebári 2,5 mlrd. dollar bolsa, 2013 jyly bul kórsetkish 220 mıllıardqa deıin jetti. Biz elimizdiń 2050 jylǵa deıingi damý strategııasyn qabyldadyq jáne ındýstrııalyq-ınnovasııalyq damý baǵdarlamasyn iske asyrýdamyz, – dedi Nursultan Nazarbaev. Sonymen birge Qazaqstan Prezıdenti ekijaqty saýdanyń kórsetkishi onsha joǵarǵy emestigine nazar aýdara kelip, Hamad ben Isa Ál-Halıfanyń sapary yntymaqtastyqty odan ári damytýǵa aıtarlyqtaı yqpal etýi tıistigin atap ótti. О́z kezeginde Bahreın Koroli osy sapary ekijaqty qarym-qatynastardy nyǵaıtýda mańyzdy qadamǵa aınalatynyna senimin bildirdi. – Biz Qazaqstanmen tyǵyz yntymaqtastyqqa múddelimiz. Qarym-qatynastarymyzdy damytý – biz úshin ortaq mindet. Biz dıplomatııa, azyq-túlik qaýipsizdigi, aýyl sharýashylyǵy, qarjy, ınvestısııa jáne bilim berý salalarynda qol qoıylǵan ózara túsinistik týraly memorandýmdarǵa qanaǵattanýshylyq bildiremiz, – dedi Hamad ben Isa Ál-Halıfa. Sáken Maılybaı. Derekkóz: Aqorda saıty.