Bilim jáne ǵylym mınıstrliginiń habarlaýynsha, saýyqtyrý kýrsynyń uzaqtyǵy – 22 kún. Saýyqtyrý kesheni bir jyldyń ishinde 12 aýysym jasaıdy. 2022 jyldyń basynan beri saýyqtyrý kesheninde Almaty qalasy, Almaty, Jambyl jáne Túrkistan oblystarynan 440 bala sanatorııalyq ońaltý kýrsynan ótken. Olardyń 63,9%-ynda tynys alý organdarynyń aýrýlary jáne álsiz ımmýnıtet, 9%-ynda anemııa bar, aqýyz-energetıkalyq jetispeýshilik – 15,4%, artyq salmaq – 2,8%, lor músheleriniń aýrýlary – 7,9% jáne basqalary – 0,9%.
«Bóbek» ulttyq ǵylymı-praktıkalyq, bilim berý jáne saýyqtyrý ortalyǵynyń bas dırektory Baıan Faızýllına: «Memleket basshysy balalarǵa erekshe kóńil bólý keregin atap ótip, 2022 jyldy Balalar jyly dep jarııalady. Osy jyldyń basynan beri Bilim jáne ǵylym mınıstrliginiń qoldaýymen «Bóbek» ortalyǵynda jetim balalar, ekologııalyq qolaısyz aımaqtardan shyqqan, kópbalaly jáne az qamtylǵan otbasylardan shyqqan 1 320 bala ońaltýdan ótti», dedi.
Saýyqtyrý kýrsy 019 «Balalardy saýyqtyrý, ońaltý jáne olardyń demalysyn uıymdastyrý» memlekettik bıýdjettik baǵdarlamasy sheńberinde júzege asyrylady. Balalardy jergilikti jerlerdegi bilim berý uıymdary irikteıdi.
Saýyqtyrý kesheninde balalar densaýlyǵyn jaqsartyp qana qoımaı, sonymen birge mektep baǵdarlamasyna sáıkes oqýyn da jalǵastyrady. Oqýdan jáne emdelýden bos ýaqytta balalar kórikti oryndarǵa, haıýanattar baǵyna jáne t.b. jerlerge barady.
«Meniń ulym 9 jasta, ol anemııamen aýyrady. Naýryz aıynyń basynda balam saýyqtyrý kýrsynan ótý úshin Almatyǵa bardy. Ulym qýanyp, kózi janyp oraldy. Ortalyqta balalar úshin qandaı jaǵdaı jasalǵanyn, balalar ol jaqta ózderin jaqsy sezingenin únemi aıtyp otyrdy. Ortalyqta balalar kúnine 6 mezgil tamaqtanǵan. Vıtamınder kýrsyn alyp, tisterin emdep, basqa da kóptegen emdik prosedýrany qabyldady», dedi saýyqtyrý kýrsyn qabyldaǵan balanyń ata-anasy.
