О́nerden órnek izdegen

«Balalar jyly» aıasyn­da júzege asqan jobaǵa júzdegen jetkin­shektiń jeke jumystary qoıylǵan. О́nerden órnek izde­gen órenderdiń ómirdi qabyl­daýy da ártúrli. Zańǵar kókke qol sozǵan asqar taýlar, qyzǵal­daǵy qulpyrǵan jazıra jotalar, aınadaı tunyq aıdyn kól­der olardyń armanyna qa­nat bitirgen.

«Birge jasaımyz» jobasy men «Sen sýretshisiń» sheberhanasy keskindeme mektebi retinde 10 jyl boıy qalalyq jáne aýdandyq kórmelerge belsendi qatysyp keledi. Jas sýretshilerge arnap Qazaqstan men Ýkraınanyń belgili beıneleý óner sheberleri shyǵar­mashylyq sabaqtar, túrli ple­ner­ler ótkizýdi dástúrge aı­nal­­dyrǵan. Mektep túlekteri bú­ginde tek Almaty qalasynyń ǵana emes, sonymen qatar AQSh, An­glııa, Aýstralııa jáne basqa da elderdiń kórkemsýret kol­ledjderi men joǵary oqý oryn­darynyń stýdentteri.

 Eń bastysy, atalǵan shyǵar­mashyl orta ónerge nemquraıdy qaramaıtyn, óz daryndaryn shyń­daǵysy keletin túrli jastaǵy adamdardy biriktire aldy. Sebebi shyǵarmashylyq ushqynyn árbir adam boıynan tabýǵa bolady. Kenep betinde senimdi syrǵyǵan qylqalam qımylynan túrli jolaqtar, boıaýlar men beıneler paıda bolyp, sońynda tamasha bir kartınanyń dúnıege kelýin baqylaý da bir ǵanıbet. Kúni keshe ónerden alshaq júrge­nińmen búgin ózińdi keskin­deme ónerinde baıqap kórgen tipti de bólek. Balalar shyǵar­mashylyǵyn qoldaý, ata-analar men oqytýshylardyń ó­zara qarym-qatynastaryn dáripteý maqsatynda ashylǵan kórme shahar turǵyndary men qonaqtaryna osyndaı keremet áser syılaıdy.

 Beıneleý óneriniń bar­lyq túrin qamtyǵan týyndylar jas sheberlerdiń ishki ále­mindegi tolqynysyn pash etedi. Qanshama jazyqsyz jan­dar japa shekken áskerı qaq­ty­ǵystar, álemdegi geosaıası turaqsyzdyq balalardyń da kóńil alańyna aınalǵan. Adam­zatty beıbit ómirge shaqyrǵan kartınalarda balalar jylamasa, ata-analar aman bolsa degen áppaq tilek jatyr. Birlik pen yntymaqty tý etken kenep jaǵyndylarynan tazalyqtyń ıisi ańqıdy.