«Túrkitildes memleketterdiń múftıler alqasy rýhanı-dinı konsýltatıvtik-keńesshi organ retinde birqatar bastamaǵa muryndyq bola alady. Birinshiden, memleketterimiz arasyndaǵy yntymaqtastyqty arttyrýǵa úles qosý. Islam qundylyqtary men rýhanııatyn dáripteı otyryp, túrki halyqtarynyń dinaralyq baılanysyn arttyrý mańyzdy. Túrkitildes elder arasyndaǵy dinı-etnıkalyq negizde týyndaıtyn shıelenisti kelissóz arqyly retteýge bar kúsh-jigerimizdi jumsaýymyz tıis. Alqaǵa múshe elder arasynda shıeleniske jol bermeý, kerisinshe dinı, rýhanı jaǵdaıdy jetildirý din men memleket qatynasyn laıyqty damytýǵa sep bolary anyq. Ekinshiden, túrli bólinýshilikterge jol bermeý. Atap aıtqanda, násildik, dinı, etnıkalyq bólinýshilikterge jol bermeı, saıası ıdeologııalyq arandatýshylyqqa qarsy turýymyz qajet. Qazirgi tańda dástúrli túrki-Islam dúnıetanymy qundylyqtaryn burmalaý, túrki halyqtary jáne musylmandar týraly jalǵan pikirler men kózqarastar qalyptastyrý jaǵdaılary kezdesedi. Biz buǵan qarsy turýymyz kerek. Mundaı keri áreketterdi dálelmen áshkerelep, ortaq sheshimder qabyldaǵanymyz abzal», dedi Bas múftı.
Sondaı-aq Naýryzbaı qajy Taǵanuly túrkitildes memleketterdiń múftıler alqasy aıasynda birigý mańyzdylyǵyn aıtyp ótti.
«Alqany qurýdaǵy maqsat – túrkitildes halyqtardyń yntymaqtastyǵy men baýyrlastyǵyn odan ári nyǵaıtý. Sondaı-aq, túrki dúnıesiniń tarıhı, rýhanı jáne mádenı murasyn saqtaý baǵytynda qabyldanǵan sheshimder men bastamalardy iske asyrýdy jan-jaqty qoldaý. Bizdiń, túrki halyqtarynyń, nanym-senimi, tildik negizi, salt-dástúri, tipti tarıhymyz ben rýhanııatymyz da ortaq. Sebebi, babalarymyz tutas adamzatty ǵylym-bilim arqyly órkenıetke bastaǵan kemeńger tulǵalar bolatyn. Túrki jurtynan shyqqan ál-Farabı, Ibn Sına, Bırýnı, Buharı, Matýrıdı, Iаsaýı sekildi ǵulama babalarymyz bilimniń shyraǵyn jaǵyp qana qoımaı, Islam órkenıetinen óziniń laıyqty ornyn belgiledi. Sonyń arqasynda túrki-ıslam mádenıeti men órkenıeti aıtarlyqtaı damyp, túrkilik renessans dáýiri qalyptasty», dedi QMDB tóraǵasy.
Ol Túrkistan tórinde jınalý túrkitildes elderdiń ǵasyrdan ǵasyrǵa jalǵasyp kele jatqan baılanysyn nyǵaıtyp, tarıhı-rýhanı sabaqtastyq jibin jalǵaıtynyna senimdilik bildirdi.
«Shynynda, qazirgideı qym-qýyt ýaqytta barshamyzdyń din nasıhatynda ortaq bolýymyz mańyzdy. Sebebi Islam ǵalymdary «Baýyrmaldyq – ıman keltirgenderdiń ózara súıispenshiligi men din nasıhatynda ortaq bolýy» degen. Sondyqtan búgingi basqosýymyz bizdiń, túrki memleketteri bas múftıleriniń baýyrmashyldyq baılanysyn jandandyra túsedi degen senimdemin. Alla yntymaqtastyǵymyzdy arttyryp, asyl dinimizdiń aıbynyn asyrý úshin birlesip qyzmet etýdi barshamyzǵa násip etsin! Tamyry bir, tarıhy ortaq elderimizdiń aýyzbirshiligi arta bersin!» dedi Naýryzbaı qajy Taǵanuly.
