Erekshe balalarǵa qyzmet kórsetetin mekemeler kóbeıedi

Aldymen Prezıdenttiń sózin eske tú­sirsek, Q.Toqaev 2021 jyly 25 aqpan­da ótken Ulttyq qo­ǵam­dyq senim keńe­si­niń otyrysynda elimizde erekshe bi­lim berý qa­jettilikteri bar balalar sany ósip kele jatqanyn, olarǵa qyz­met kór­setetin mamandandyrylǵan uıym­­dardyń jumysyna qatysty nor­malardyń eskirgenin jetkizdi. «Tek­se­rý­den ótý úshin balalar óz kezegin jarty jyl kútýge májbúr. Osydan keıin olarǵa jan-jaqty keshendi ońaltý qajet. Bul úshin tıisti mekemeler jetispeıdi. Sondyqtan osy saladaǵy normatıvterdi óńirler­diń erekshelikterin jáne qa­zirgi zamanǵy standarttardy eskere oty­ryp jańartý qajet. Búginde bir psıhologııalyq-medısınalyq-pedago­­­­­gı­kalyq komıssııa 60 myń balany qamtıdy. Komıssııa jumysynyń tıim­di­ligin arttyrý úshin bul nor­­matıvti 50 myń balaǵa deıin tó­mendetý qajet. Sondaı-aq erekshe qajettilikteri bar ba­lalardy arnaıy psıhologııalyq-peda­gogıkalyq qol­daý­ǵa memlekettik bilim berý tapsyrysyn engizý kerek. Bul úlken bıýdjettik shyǵyndarsyz bala­lardy osy qyzmettermen qamtýdy edáýir art­tyrýǵa múmkindik beredi», dedi Q.Toqaev.

Memleket basshysynyń tap­syrma­sy­na sáıkes, jýyrda Má­ji­listiń jalpy otyrysyn­da taǵy bir mańyzdy norma qabyldandy. Bul PMPK (psı­ho­lo­gııalyq-me­dı­sınalyq-pedagogı­kalyq konsýltasııalar) ashý nor­matıvin 60-tan 50 myń balaǵa deıin ózgertý týra­­­ly bolyp otyr. Bilim jáne ǵylym mınıstri Ashat Aımaǵambetov jańa norma qandaı ózgeristerge ákeletinin aıtty. «Qazir 87 PMPK jumys istep tursa, endi eli­miz­diń barlyq óńirinen qosymsha taǵy 40-qa jýyq PMPK ashylady. Bul kezek máselesin sheshýge, balalardyń erekshe bilim berý qajettilikterin erte anyqtaýǵa jáne sapaly baǵalaýǵa sep­tigin tıgizedi. Esterińizge sala keteıin, Ulttyq qo­ǵam­­dyq senim keńesiniń oty­rysyn­da Prezıdent Úkimetke osy má­se­le boıynsha sharalar qabyldaýdy tapsyrǵan bolatyn. Balalar jyly aıasynda ózekti jáne uzaq ýaqyt boıy sheshimin tappaǵan máselelerdi sheshýge baǵyttalǵan birqatar jańa bas­tama iske asyrylady», dedi mınıstr A.Aımaǵambetov.

Oqyrmandarǵa túsinik bere ke­te­ıik, PMPK – damýynda prob­le­masy bar balalardy oqytýdyń túri men nysanyn anyqtaý kezinde saraptamalyq qyzmet fýnksııasyn atqaratyn memlekettik mekemeler. Damýyndaǵy kemshiligi sal­darynan bilim berý uıymdarynda oqı almaıtyn balalardy tekseredi. Onyń quramyna keńes berýshi mamandar: psıho­nevrologter, psıhologter, logoped-defektologter, áleýmettik pedagogter kiredi.