Iriktelgen segiz teatr ishinen oza shapqan óner ujymy atalǵan festıvalge «Makbet. Illıýzııa» qoıylymymen qatysyp, «Úzdik qoıylym» jáne «Úzdik ssenografııa» nomınasııalaryn qanjyǵasyna baılady.
Shyndyq pen eles, ambısııa men kúsh, kiná men ókinish... Batyl ári asyl adamnyń zulymǵa aınalýy ony qumarlyqtyń quly etedi. Illıýzııalyq sana daǵdarysyna ushyraǵan Makbet urpaq súıý jolynda soqyr úmitke senip, qolyn qanǵa boıaıdy. Adamzatqa ortaq máseleni bir otbasynyń taǵdyrymen sýrettegen aǵylshyn dramatýrgi Ýılıam Shekspırdiń keıipkerleri alǵash ret qýyrshaq beınesinde til qatty.
Aıta keteıik, qoıylymnyń rejısseri – D.Jumabaeva, sýretshisi – Iý.Chernova, baletmeısteri – A.Soı, kompozıtory – G.Iýn.
Atalǵan festıval ádettegideı teatr ónerin damytyp, shyǵarmashylyq toptardyń áleýetin qoldaý, jańa býynnyń qalyptasýyna hám shyǵarmashylyq bastamasyn yntalandyrý, teatr ujymdary arasynda tájirıbe almasýyna jaǵdaı jasaý maqsatynda uıymdastyrylyp otyr.
Teatrtanýshy, qazylar alqasynyń tóraǵasy Erkin Jýasbek bas júldeni ıelengen spektakl mazmunyn aıta kele: «Medeıa», «Ana-Jer Ana», «Abaı», endi mine «Makbet»... Teatrdyń keıingi bes jyldaǵy jańa baǵyty shyn máninde «qýyrshaq teatry» degen qasań túsinikti joqqa shyǵardy. Qazir bul teatrdyń ataýyn ataǵanda aýzymyzdy toltyryp aıtamyz. Dál qazir teatrdyń akterlik óneriniń, rejıssýrasynyń shyn máninde nátıjesin bergenine kýá bolyp otyrmyz. О́z kórermenderi, ár jastaǵy balalarǵa arnalǵan spektaklderi óz baǵyt-baǵdarymen qoıylyp jatyr. Al «Makbet» adamdy titirkendiretin áserli qoıylym boldy», dedi.
Spektaklde bas keıipker Makbetti – Shoqan Qulnazarov, ledı Makbetti – Janar Maqasheva sahnalady.
Festıvalge Memlekettik qýyrshaq teatrynan bólek Q.Qýanyshbaev atyndaǵy Memlekettik akademııalyq qazaq mýzykalyq drama teatry (Nur-Sultan), Shyǵys Qazaqstan oblystyq «Darıǵa-aı» jastar teatry (Semeı), S.Qojamqulov atyndaǵy Jezqazǵan qazaq mýzykalyq drama teatry, A.Pýshkın atyndaǵy Orsk memlekettik drama teatry (Reseı), S.Muqanov atyndaǵy memlekettik qazaq sazdy-drama teatry (Soltústik Qazaqstan oblysy), N.Jantórın atyndaǵy Mańǵystaý oblystyq mýzykalyq drama teatry (Mańǵystaý), T.Ahtanov atyndaǵy Aqtóbe oblystyq drama teatrynyń ujymdary qatysty.
Búginde baldyrǵandardan bólek eresekterge arnalǵan keshki qoıylymdardy da sahnalap, jańa formatqa kóshken óner ordasy álemniń klassıkalyq týyndylaryn qýyrshaq beınesinde sóıletip júr.
Respýblıkalyq, halyqaralyq festıvalderde júldeli oryndar alyp júrgen «Ana júregi» (avt. E.Ionov, rej. A.Zaısev), «Ana-Jer Ana» (avt. Sh.Aıtmatov, rej. D.Jumabaeva), «Medeıa» (avt. Evrıpıd, rej. A.Salban), «Romeo men Djýletta» (avt. Ý.Shekspır, rej. D.Jumabaeva), «Men bir jumbaq adammyn... Abaı» (ınssenırovka avt. E.Lokshına, rej. A.Zaısev) syndy eresekterge arnalǵan qoıylymdar teatr repertýarynan erekshe oryn alady.
Aıta keteıik, bul qoıylym 20-30 mamyr aralyǵynda Konıa qalasynda (Túrkııa) ótetin XIV Túrkitildes elderdiń Halyqaralyq «Myń tynys – bir daýys» teatrlar festıvaline, sondaı-aq maýsym aıynyń 1-5 kúnderi aralyǵynda Novosıbırsk qalasynda (Reseı) ótetin «Perekrestok» II Halyqaralyq qýyrshaq teatrlary festıvaline arnaıy shaqyrtý alyp, negizgi konkýrstyń qatysýshylar tizimine endi.
