Dúnıejúzilik gımnazıada 14-22 mamyr aralyǵynda Fransııanyń Normandııa qalasynda ótedi. Sporttyq jarystarǵa álemniń 70 elinen 16-18 jas aralyǵyndaǵy 3,5 myńnan astam oqýshy qatysady dep kútilýde.
«Dúnıejúzilik gımnazıadaǵa qatysý mektep sportynyń jáne mektep lıgasynyń damýyna septigin tıgizedi. Balalar jyly jas sportshylarymyz úshin osyndaı mańyzdy oqıǵamen erekshelenip otyr. Ulttyq qurama 296 adamnan turady. Onyń 234-i jas sportshy, 49-y jattyqtyrýshy, 9-y tóreshi jáne 4-eýi shtab múshesi. Biz sporttyń 18 túrinen óner kórsetemiz. Oqýshylarymyz barynsha kóp medal alýǵa tyrysady. Biz sport túrleri boıynsha mektep lıgalaryn belsendi túrde damytamyz. Balalar ol jarystarǵa qýana qatysady. Oqýshylardyń sportqa jappaı qatysýy – bizdiń basty mindetimiz», dedi QR BǴM Ulttyq ǵylymı-praktıkalyq dene tárbıesi ortalyǵynyń dırektory Saǵdat Sadyqov.
Sporttyq jarystar Normandııanyń 9 qalasynda sporttyń 20 túrinen ótedi. Qazaqstandyq oqýshylar badmınton, 3h3 basketbol, boks, erkin kúres, áıelder kúresi, grek-rım kúresi, dzıýdo, jeńil atletıka, ústel tennısi, sporttyq baǵdarlaý, júzý, jaǵajaı voleıboly, regbı, sporttyq gımnastıka, sadaq atý, taekvondo, semserlesý, kórkem gımnastıka sııaqty sport túrlerinen óner kórsetedi.
