Bul týraly Tashkentte ótken «Space Technology Sonference Central Eurasia» konferensııasynda «Qazaqstan ǵarysh sapary» UK« AQ basqarma tóraǵasy Aıdyn Aıymbetov málimdedi.
«Ǵarysh salasy – elimiz úshin ǵylym men tehnıkanyń tyń baǵyty, ǵaryshtyq tehnologııalar, geofızıka, medısına jáne bıologııa, bıotehnologııalar jáne irgeli ǵylymdar salasyndaǵy ǵylymı synaqtar ǵarysh jetistikterin kez kelgen qyzmet salasyna endirýge múmkindik beredi», dedi Aıdyn Aıymbetov.
«Qazaqstan ǵarysh sapary» kompanııasynyń aqparaty boıynsha, eksperımenttik qurlyq kesheni ǵarysh stansasynyń bir bóligi túrinde turǵyzylyp, onda zertteýshiler uzaq merzimdi synaqtar júrgizedi. Modýldiń jumysqa jaramdylyǵyna jergilikti tirshilikti qamtamasyz etý júıeleri jaýap beredi. Keshen ǵaryshtaǵy jaǵdaıǵa barynsha jaqyndatylady. Zertteý qatysýshylary sol ortada úzdiksiz jumys isteıdi.
Keshenniń negizgi mindetterine ǵarysh qyzmetiniń tynys-tirshiligin qamtamasyz etý júıelerin, medısınalyq profılaktıka quraldaryn, ekıpajdyń jumysqa qabilettiligi men sergektigin, ekıpajdyń derbestigin, oqshaýlaný saldaryn jáne onymen baılanysty fızıologııalyq stressorlardy zerdeleý kiredi.
«Ortalyq Azııadaǵy alǵashqy ǵaryshtyq zertteý modýli kóptegen entýzıast jandardyń armanyn júzege asyrýǵa múmkindik beredi. Ǵaryshqa ushý baqyty búkil álem boıynsha tek sanaýly adamǵa ǵana buıyrýy múmkin. Al qazaqstandyq eksperımenttik keshen bolashaqta júzdegen ǵalymdar men myńdaǵan týrıstiń armanyn oryndaı alady», dedi jobanyń seriktesi Eurasian Space Ventures jeke ǵarysh kompanııasynyń negizin qalaýshy Shýhrat Ibragımov.
Keshen bıyl tanystyrylatyn bolady.
