Prezıdent Ulttyq banktiń jyldyq esebin qabyldady

Jıynǵa Ulttyq banktiń tóraǵasy Ǵalymjan Pirmatov, Prezıdent Ákimshiligi Basshysynyń birinshi orynbasary Tımýr Súleımenov, Premer-Mınıstrdiń orynbasary Erulan Jamaýbaev, Qarjy naryǵyn retteý jáne damytý agenttiginiń tóraǵasy Mádına Ábilqasymova, Ulttyq ekonomıka mınıstri Álibek Qýantyrov, sondaı-aq Ulttyq bank tóraǵasynyń orynbasarlary qatysty.

Qasym-Jomart Toqaev 2021 jyly júzege asyrylǵan aqsha-kredıt saıasatynyń qorytyndylary, ınflıasııany tejeý jáne qarjylyq turaqtylyqty qamtamasyz etý sharalary, bıýdjet kirisin arttyrý, Ulttyq banktiń altynvalıýta rezervi men Ulttyq qordaǵy aktıvterdiń jaǵdaıy týraly baıandamalardy tyńdady.

Budan bólek Prezıdentke depozıtterdi dollarmen salý deńgeıiniń 36,0 paıyzǵa deıin tómendegeni, memlekettik qundy qaǵazdaǵy naryqtyq ınvestorlardyń úlesi 69,2 paıyzǵa deıin kóbeıgeni jáne halyqtyń qolma-qol aqshasyz tólem jasaý operasııalarynyń kólemi 73,1 trıllıon teńgege deıin jetkeni jóninde baıandaldy. 2021 jyly depozıtter 27,1 trıllıon teńgege deıin, sonyń ishinde teńgemen salynǵan depozıtter 17,3 trıllıon teńgege deıin ósti.

Memleket basshysy elimizde qabyldanǵan sharalardyń arqasynda Qazaqstan ekonomıkasynyń ósimi 2021 jyly 4,1 paıyz bolǵanyn atap ótti. Sonymen qatar ınflıasııanyń ósimi buryn-sońdy bolmaǵan deńgeıge kóterilgenine nazar aýdaryp, bıylǵy tórt aıdyń qorytyndysy boıynsha 2016 jyldyń qyrkúıeginen beri eń sharyqtaý shegine, ıaǵnı 13,2 paıyzǵa jetkenin aıtty. Prezıdent atalǵan máselelerdi sheshý úshin Úkimettiń, Ulttyq banktiń jáne basqa da memlekettik organdardyń jumysyn kúsheıtý mańyzdy ekenine toqtaldy.  

Osy rette Qasym-Jomart Toqaev ınflıasııany belgilengen shekti mejege qaıtarýdyń mańyzdy ekenin atap ótti, sondaı-aq Úkimetke Ulttyq bankpen birlesip, Inflıasııa deńgeıin baqylaý jáne tómendetý jónindegi 2022-2024 jyldarǵa arnalǵan keshendi sharalardyń tolyqqandy júzege asyrylýyn qamtamasyz etýdi tapsyrdy.

Memleket basshysy Ulttyq qordyń jumysyna arnaıy toqtalyp, pandemııa jaǵdaıynda jáne ekonomıkalyq ahýal nasharlaǵan kezde Qor óz mindetin tolyq oryndaǵanyn atap ótti. Prezıdent Ulttyq qordyń qarjysyn tıimdi paıdalaný qajettigine mán berdi.

– Ulttyq qordan jasalǵan transfertter 2020 jyly 4,8 trıllıon teńgeni, al 2021 jyly 4,5 trıllıon teńgeni qurady. Bıyl Úkimet taǵy da 4,6 trıllıon teńge suratyp otyr. Bul – óte qomaqty qarjy. Respýblıkalyq bıýdjet Ulttyq qordyń qarajatyn paıdalanýǵa súıenbeýi kerek. Transfertterdi birtindep azaıtý qajet, – dedi Prezıdent.

Budan bólek Qasym-Jomart Toqaevqa aksııalar naryǵynyń ósýine oraı teńgerimdi allokasııaǵa kóshý jóninde baıandaldy. Bul sońǵy 3 jyl ishinde Qordyń kirisin 10,75 mıllıard dollarǵa jetkizýge múmkindik berdi.

Memleket basshysy Úkimetke iri jobalardy naryqtyq mehanızmder, memlekettik-jekemenshik seriktestikter, qaryz qarajattary, respýblıkalyq bıýdjet qarjysyn qaıta bólý esebinen júzege asyrý múmkindikterin pysyqtaýdy tapsyrdy. Atap aıtqanda, Qasym-Jomart Toqaev elimizdiń tranzıttik áleýetin kúsheıtýge, sonyń ishinde «Dostyq-Moıynty» temirjol ýchaskesi men basqa da birqatar memleketaralyq temirjol dálizin jańǵyrtýǵa nazar aýdardy.

Sonymen qatar jıynda Ulttyq qordyń ınvestısııalyq kirisin arttyrý, aktıvterdi tıimdi basqarý, altynvalıýta rezervteriniń ótimdiligi men saqtalýyn qamtamasyz etý máseleleri qarastyryldy.

Keńes barysynda  Prezıdent tólem teńgeriminiń tapshylyǵyna qatysty máseleni kóterdi jáne ony birtindep azaıtý qajet ekenin atap ótti.

Ulttyq banktiń ókilderi ulttyq tólem júıesin damytý jumystarynyń nátıjeleri týraly da aıtty. 2021 jyly Ulttyq tólem júıesiniń Tólem kartalarynyń bankaralyq júıesi men Jedel tólem júıesi sııaqty komponentteri pılottyq rejımde iske qosylǵan. Sondaı-aq sıfrlyq teńge platformasynyń prototıpin ázirleý jumystary aıaqtalǵan.

Prezıdent jıyndy qorytyndylaı kele, Ulttyq banktiń jyldyq esebin maquldady.

– Álemdegi qazirgideı kúrdeli kezeńde elimizdiń qarjylyq turaqtylyǵyn qamtamasyz etý óte mańyzdy. Ulttyq bank Qarjy naryǵyn retteý jáne damytý agenttigimen birlesip, aqsha-nesıe saıasatynyń tıimdiligin arttyrýǵa basa mán berýi qajet jáne qarjy sektorynyń áleýetin maqsatty túrde kúsheıtýi kerek, – dedi Qasym-Jomart Toqaev.