Ǵalymdar muǵalimderge keńes berdi

Q.Sátbaev atyndaǵy Qazaq ulttyq tehnıkalyq zertteý ýnıversıtetiniń bir top ǵalymy Qarasaı ­aýdany bilim bóliminiń Áljan Buqarbaıqyzy atyn­da­ǵy qazaq orta mektebiniń bastamasymen Altyn aýyl orta mektebi bazasynda muǵalimderge óz tájirıbesin bólisti. Q.Sátbaev atyndaǵy QazUTZÝ professor­lyq-oqytýshylyq quramynyń ókilderi aýdandaǵy bar­lyq bilim berý mekemesinen kelgen qatysýshylarǵa ınjenerlik beıindi zerthanada atqarylyp jatqan ǵylymı izdenister týraly aıta kelip, óz jumystarynyń ıerarhııasy týraly baıandady.

Atalǵan ýnıversıtettiń professory, ınjenerlik beıindi zerthana jetekshisi Seıthan Azat sabaqtas­tyq­tyń mańyzyna toqtaldy.

– Oqýshylardyń qalalyq jáne respýblıkalyq jobalar konkýrsynda qazy bolǵan kezimde kóptegen problemany baıqadym. Oqýshylar joba konkýrsyna bir aı nemese bir apta qalǵanda ǵana daıyndala bastaıdy. Keıbiri tipti daıyn dıssertasııalyq, dıplomdyq jumys negizinde konkýrstarǵa qatysady. Aýyldyq jerdegi mektepterdiń materıaldyq jaǵdaıy ǵylymı tájirıbeler jasaýǵa múmkindik bermeıdi. Kez kelgen ýnıversıtet zerthanalarymen birlese jumys atqarý da qoljetimdi emes. Sondyqtan ýnıversıtet-mektep-óndiris ortasynda ortaq alań jasaý oıymyzda bar. Dál osyndaı aýqymdy semınar respýblıka kóleminde birinshi ret ótip jatyr. Basty maqsat – oqýshylardyń sapaly ǵylymı jobalar jasaýyna durys baǵdar berý jáne jaǵdaı jasaý. Aldaǵy kúnderi ýnıversıtet pen mektepter arasynda memorandýmǵa qol jetkizip, ýnıversıtet janynan mektep oqýshylaryna arnalǵan zerthanalar, ortalyqtar ashyp sapaly kadrlar daıyndaýdy qolǵa almaqpyz, – deıdi S.Azat.

Onyń aıtýynsha, Qarasaı aýdany Shamalǵan aýylynyń Áljan Buqarbaıuly atyndaǵy qazaq orta mektebi dırektorynyń orynbasarlary mektep oqýshylarynyń ǵylymı joba daıyndaýy, ony rásim­deýi barysyndaǵy kedergilerdi joıý joldary jaıly Q.Sátbaev atyndaǵy QazUTZÝ ınjenerlik beıindi zerthanasynan kómek suraǵan. Alǵashqy kezde onlaın vebınar ótkizip, joba daıyndaýǵa qoıylatyn talaptarmen tanystyrypty. Endi sol jumys óz jalǵasyn taýyp, semınarǵa ulasyp otyr. Aldaǵy jumys mektep-ýnıversıtet-óndiris formatynda órbýi kerek.

A.Kerimbekov atyndaǵy orta mekteptiń aǵylshyn tili páni muǵalimi Erden Erlanuly:

– Semınardan erekshe sezimmen shyqtym. Birinshi­den, Q.Sátbaev atyndaǵy ulttyq tehnıkalyq zertteý ýnıversıteti tárizdi irgeli ǵylym ordasy men qara­paıym aýyl mektebi arasyndaǵy yntymaqtastyq deńgeıi qýantty. Ekinshiden, semınar barysynda Q.Sátbaev atyndaǵy QazUTZÝ ǵalymdary ǵylymı-zert­teý jumystarynyń baǵytyn, taqyrybyn tańdaý­dan bastap olardy uıymdastyryp júrgizý ádis-tásilde­rine toqtalyp, nátıjege qol jetkizý kezeńderine de­ıin táptishtep túsindirdi. Ǵalymdar óz jumystary­men tanystyrǵanda olardyń ǵylymı eńbekteri aıasynda mektep oqýshylaryna qoljetimdi, zertteýge turar­lyq taqyryptar anyqtap aldym, – deıdi.