Memleket basshysy jarııalaǵan bıylǵy balalar jyly aıasynda qazaqstandyqtar «Nickelodeon» telearnasynyń mýltfılmderin memlekettik tilde tamashalaı alady.
QR AQDM bastamasymen 2021 jyly tanymal balalar arnalaryn qazaq tiline aýdarý jobasy - óskeleń urpaqtyń damýyna eleýli úles qosady.
Brıfıngte Aqparat jáne qoǵamdyq damý vıse-mınıstri Danııar Qadyrov sóz alyp, «Mınıstrlik óte aýqymdy jobany iske asyrýda. Qazaq tilindegi jańa arnanyń iske qosylýy balalardyń memlekettik tilge degen qyzyǵýshylyǵyn arttyrýǵa septigin tıgizedi. Sondaı-aq bul jobanyń óskeleń urpaq úshin tárbıelik máni zor», dep atap ótti.
Sonymen qatar «Nickelodeon» telearnasynyń TMD jáne Baltyq elderindegi balalar men oıyn-saýyq brendterin damytý jónindegi vıse-prezıdenti-Marııa Kosareva «Nickelodeon» kórermenderi arnanyń qyzyqty baǵdarlamalyq bloktarynyń arqasynda emosııalyq ıntellektti damytatynyn atap ótti. Bul óz kezeginde balalardyń, sonyń ishinde túrli etnostardyń memlekettik tildi jyldam meńgerýine múmkindik beredi.
«Biz áriptesterimizge habar taratýdy iske qosýda qoldaý bildirgenderi úshin alǵysymyzdy bildiremiz jáne abonentterdi aqparattandyrý aıasynda odan ári jemisti yntymaqtastyqqa úmittenemiz», dedi Marııa Kosareva.
Esterińizge sala keteıik, arnalardy tańdaý kezinde áleýmettik saýalnamalardyń nátıjeleri jáne balalar arasynda taratylatyn mýltfılmderdiń tanymaldyǵy eskerildi.
Máselen, «Nickelodeon» brendteri álemniń 180-ge jýyq elinde jınaqtalǵan, olardyń keıipkerleri 40-tan astam túrli tilde sóıleıdi.
Arnanyń baǵdarlamalyq bloktary anımasııalyq fılmder men telehıkaıalardan, oıyn-saýyq, sporttyq jáne mýzykalyq baǵdarlamalardan turady.
Qazirgi ýaqytta «Nickelodeon HD» jańa arnasy Alma TV jáne TV Commerce kabeldik operatorlary arqyly efırge shyǵady, qalǵan operatorlarmen ózara tyǵyz jumys jalǵasýda.
