О́ner • 18 Mamyr, 2022

Talant rýhyna taǵzym

25 ret kórsetildi

Qyzylordada ánshi-kompozıtor Batyrhan Shókenovtiń 60 jyldyǵyna arnalǵan «Otan-Ana» atty respýblıkalyq ánshiler konkýrsy ótti. Alǵash úlken sahnaǵa «Araı» tobynyń quramynda shyǵyp, ózi aıtqan «Aq kógershin» ánindegi qalyqtaǵan qustaı óner kógine erkin kóterilgen ánshi shetel tyńdarmandaryn da tánti etken edi. Ol shyqqanda sahna túrlenip sala beretin. Kez kelgen áni hıtke aınalyp, tez jattalatyn. Ǵumyr kesesi erte tolǵan talant bıyl 60 jasqa tolar edi.

Syrboıylyqtar halqynyń qurmetine bólengen uldarynyń izin óshirmeý úshin qoldan kelgenniń bárin jasap otyr. Qazir qala ortalyǵyndaǵy saıabaqtyń biri Batyr­han esimin ıelengen. Jurt aıaǵy úzilmeıtin saıabaqqa kelgen adamdy saksofonyn aıalaı ustaǵan ánshiniń músini qarsy alady. Týǵan kúni – 18 mamyrǵa oraılastyra uıymdastyrylatyn «Otan-Ana» respýb­lıkalyq ánshiler konkýrsy barsha óner­súıer qaýymdy osymen úshinshi márte Syr tórine jınap otyr.

Konkýrstyń ashylýynda oblys ákimi Nurlybek Nálibaev sóılep, Batyrhan Shóke­nov halyqtyń mahabbatyna bólengen óner ıesi bolǵanyn atap ótti.

– Búgingi «Otan-Ana» respýblıkalyq ánshiler konkýrsy kóktemde týǵan jerine saǵynyshpen kelgen jyl qusyndaı barsha ónersúıer qaýymdy ádemi áserge bólep otyr. Talantqa kórsetiler qurmet onyń mereıtoıy aıasynda shektelip qalmaıdy. Aldaǵy ýaqytta B.Shókenov shyǵarmalaryn oryndaýshylar konkýrsy, djaz aıtýshylar jáne saksofonshylar saıysy sekildi túrli mádenı is-sharalarmen tolyǵatyn bolady.

Syr boıynyń talantty uly, óner tarlany Batyrhan Shókenovtiń esimi halqynyń júreginde máńgi saqtalady, – dedi oblys basshysy.

Saltanatty jıynda oblys ákimi Syr halqy atynan Batyrhan Shókenovteı daryndy uldy ómirge ákelgen anasy Dılara Ibragımqyzyna qurmet bildirip, ıyǵyna zerli qamzol japty.

«Otan – ana» atty respýblıkalyq án­shiler konkýrsyna ár óńirden kelgen 20 jas ónerpaz qatysty. Baıqaýdyń birinshi ke­zeńinde konkýrsanttar Saz & soul bendiniń súıemeldeýimen Batyrhan Shóke­novtiń repertýarynan án oryndady.

Qazylar alqasynyń quramynda kompozıtor, mýzykant, oranjırovshık, halyq­aralyq konkýrstardyń laýreaty, qazylar alqasynyń tóraǵasy Rınat Gaısın, ánshi-kompozıtor, «Qurmet» ordeniniń ıege­ri, mádenıet salasynyń úzdigi Qaırat Bae­kenov, ánshi, Qazaqstannyń eńbek sińir­gen qaıratkeri Mádına Sádýaqasova, ánshi Dınara Kaırova jáne kompozıtor, mádenıet salasynyń úzdigi Sábıt Ulyqpanuly boldy.

 Tús aýa ekinshi kezeńi jalǵasqan konkýrs qorytyndysynda qazylar alqasynyń baılamymen bas júldeni qyzylordalyq Aqbota Qusnadın jeńip aldy. Birinshi oryn Almaty qalasynan kelgen Almagúl Battalıevaǵa tabystalsa, ekinshi oryn júl­desin nur-sultandyq Aıdyn Jumabaev ıelen­di. Qaraǵandylyq ónerpaz Janasyl Elýbaev, almatylyq Azamat Bekbergenov, Qostanaıdan kelgen Aıdana Rıza men jergilikti ánshi Aıagóz Aralbaıqyzy úshinshi oryn bıiginen kórindi.

Osy kúni úshinshi márte uıymdastyrylyp otyrǵan «Otan-Ana» atty respýblıkalyq ánshiler konkýrsyna qatysýshylar ortalyq alańda gala-konsert qoıdy. Al ánshi jaryq dúnıege kelgen 18 mamyr kúni qala ortalyǵyndaǵy Batyrhan Shókenov saıaba­ǵyna baryp, eskertkishine gúl shoǵyn qoıdy.

Talant rýhyna jasalǵan taǵzym jarq etip ótken juldyzdyń án-ǵumyry eli barda eshqashan úzilmeıtinin kórsetti.

 

Qyzylorda

Sońǵy jańalyqtar

TúrkPA-nyń ataýy ózgeredi

Parlament • Keshe

Almaty joldaryn sý basty

Aımaqtar • Keshe

Álemde altyn arzandady

Álem • Keshe

Uqsas jańalyqtar