Sport • 19 Mamyr, 2022

Altyn qyz

Shara dese, qazaqtyń mańdaıyna bitken bıshi qyzy oıǵa oralady. Al áńgimemizdiń keıipkeri Shara Hamzına sport salasynda mańdaı terin tógip, halyqaralyq jarystarda oblys bylaı tursyn, el namysyn abyroımen qorǵap júr. Alysqa barmaı-aq qoıaıyq, erjúrek qyz 12-15 mamyr kúnderi Túrkııada ótken Álem kýbogynda altynnan alqa taqty. Osylaısha, ekinshi ret atalǵan jarysta top jaryp otyr.

Oralhan AHMADIIа

Onyń kelbetine, dene bitimine kóz júgirtken jan kórkem gımnastıkamen aınalysady dep topshylaýy múmkin. Úsh múmkindik berilse de, dál taba almaıtynyna senimdimiz. Namysshyl arý kıkboksıngpen aınalysady. Iá, qaǵys estigen joqsyz. Shara atalǵan sport túrinen halyqaralyq dárejedegi sport sheberi jáne jekpe-jekten sport sheberi!

– Sporttyq jolymdy 2013 jyly bastadym. Ol kezde 19 jasta edim, «qolymdy mezgilinen kesh sermedim» deýge bolady. Sportqa kishkentaı kezden bastap barady ǵoı. Men bolsam, sol jasqa deıin birde-bir sport seksııasynyń bosaǵasyn attap kórmeppin. Kóbiniń qoıatyn suraǵy bir. «Nege erlerge tán sport túrin tańdadyń?» dep qyzyǵýshylyq tanytady. Bala kezimde teledıdardan tóbeles týraly kınolar jıi kórsetiletin. Solardyń biri tanymal akter Jan Klod Van Damm túsken «Kıkbokser» degen týyndy bolatyn. 9-synyptan bastap kıkboksıng sportyna qatty qumarta bastadym. Keıin oqýda túrli emtıhandarǵa daıyndyq kezeńi bastaldy. Osylaısha, 11-synypqa deıin sport týraly múldem oılaǵan emespin. Mektepti támamdap,

kolledjge oqýǵa túsken kezde kıkboksıng seksııasyna jazyldym. Shynymdy aıtsam, sport meniń ómirimdi qatty ózgertedi dep oılamappyn. Alǵashqy bapkerim – kıkboksıngten halyqaralyq dárejedegi sport sheberi Ersaıyn Qasambaev. Jarty jyldan keıin Qazaqstan Respýblıkasynyń eńbek sińirgen jattyqtyrýshysy Sabyrjan Jaqypovtan tálim ala bastadym. Alǵashqy jarysym 2014 jyly Qaraǵandy qalasynda ótken Qazaqstan kýbogy sarapqa salynǵan báseke edi. Onda kúmispen kúpteldim. Budan keıin bapkerimmen birge qatelikterimdi túzep, altyn medal alamyn degen maqsat qoıdym. Tynymsyz daıyndyqtyń arqasynda armanyma jettim de. 2016 jyly ótken el chempıonatynda jeńimpaz atanyp, kıkboksıngten sport sheberi normatıvin oryndadym. Sondaı-aq ulttyq quramanyń qataryna qabyldandym. Osylaısha, halyqaralyq jarystarǵa qatysa bastadym. Endigi maqsat halyqaralyq dárejedegi sport sheberi ataǵyna qol jetkizý edi. Oǵan 5 jyl ýaqyt qajet boldy. Byltyr Býdapesht (Majarstan) qalasynda ótken Álem kýbogy jarysynda altynnan alqa taǵyp, taǵy bir maqsatym oryndaldy. Árıne, áli de bıik armandar az emes. Jas sportshylarǵa aıtarym, maqsatyńa qol jetkizý úshin jalqaýlyqqa salynbaı, aıanbaı ter tógý kerek. Alynbaıtyn qamal joq ekenin umytpańyz, – deıdi Sh.Hamzına

Búginde sportshy qyz kelesi jarystarǵa tyńǵylyqty daıyndalýda. Ony suhbat alý úshin habarlasqan sátte ańǵaryp úlgerdik. Telefon arqyly 10-15 mınýt aqparat berdi de, qaıtadan sport zalyna kirip ketti.

Pavlodar oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz