Álem chempıonatynda bas júldesiz qaldyq

Álem chempıonatynda bes júlde alý óte jaqsy kórsetkish ekeni esh daý týǵyzbaıdy. Ádette jerlesterimiz atalǵan jarysta eki-úsh medaldy enshileýmen ǵana shektelýde. Qazaqstannyń áıelder quramasy óziniń eń zor tabysyna osydan alty jyl buryn Astanada qol jetkizdi. 2016 jyly jalaýy jelbiregen jarysta 4 altyn men 2 qola medaldy ıelenip, jalpy komandalyq esepte kósh bastaǵan edik. Mine, endi Ystanbulda bes boksshymyz jeńis tuǵyryna kóterildi. Desek te qazaq jankúıerleriniń bul kórsetkishke «kóńili toldy» nemese «bórikterin aspanǵa atyp qýandy» dep aıta almaımyz. Osylaısha oı qorytýymyzdyń ózindik sebepteri de bar.

Birinshiden, Anadoly eline sapar shekken 12 bylǵary qolǵap sheberimizdiń teń jartysy tusaýkeser kezdesýinde súrindi. О́zgelerdi aıtpaǵanda, Nazym Qyzaıbaı (50 kılo) men Darıǵa Shákimovanyń (66 kılo) shabysynan jańylǵanyn túsine almadyq. Alǵashqysy – álemniń eki dúrkin chempıony, sol jarystyń qola júldegeri, Azııa birinshiliginiń jeńimpazy. Ekinshisi – Rıo Olımpıadasynyń qola júldegeri, Azııanyń eki dúrkin chempıony. Iá, Qyzaıbaıdyń qarsylasy myqty bolǵany ras. Kolýmbııalyq Ingrıt Valensııanyń osydan alty jyl buryn Rıo-de-Janeı­roda alaýy tutanǵan Olımpııa oıyndarynda úshinshi orynǵa taban tiregeni esimizde. Biraq qandasymyz da qara jaıaý emes. Onyń da ataǵy dardaı. Jáne de Nazym odan baqandaı bes jas kishi. Sol 33 jastaǵy ardager sportshyny el maqtanyshyna aınalǵan boksshymyzdyń san soqtyra almaǵany tańǵaldyrdy.

Dańqty Darıǵa Shákimovanyń esi­mi kópshilikke beımálim Navbahor Hamı­dovamen kúsh synasatynyn estigende, onyń «eki aıaǵyn bir etikke tyǵatyn shy­ǵar» dep oıladyq. Biraq ózbek qyzy osal bolmaı shyqty. Ol aldap-arbap júrip-aq, Shákimovany shań qaptyryp ketti.

Ataǵy alysqa jaıylǵan Lázzat Kún­geı­baeva (81 kılo) súringende, tipti aı­tar­ǵa sóz taba almaı qaldyq. Asa aýyr salmaqta aıqasyp júrgen jerlesimiz kezinde álem jáne Azııa chempıony, álem chempıonatynyń fınalısi, qurlyq birinshiliginiń tórt dúrkin júldegeri atandy. 34 jastaǵy boksshymyz túrkııalyq Shenýr Demırmen sheberlik baıqasty. Ol da álem jáne Eýropa chempıonattarynda eki retten jeńis tuǵyryna kóterilgen saqa sportshy. Ekeýara aıqas óte shıe­lenisti ótti. Tóreshilerdiń jergilikti boksshyǵa búırekteri burǵany ras. Biraq Kúngeıbaevanyń 40 jastaǵy qarsylasyn qapy qaldyratyndaı jóni bar edi. Sol sekildi Tokıo Olımpıadasyna qatysqan Nadejda Rıabes (75 kılo) jáne talaı dúrmekte ysylǵan Rımma Volosenko (60 kılo) men jas daryn Aıda Ábikeevadan (63 kılo) da esh qaıyr bolmady.

Jartylaı fınalǵa joldama alǵan bes boksshymyzdyń tórteýi jeńilistiń kermek dámin tatqanda da kóńilimiz qat­ty qulazydy. Ásirese, eki birdeı álem chempıony – Dına Jolaman (54 kılo) men Valentına Halzovaǵa (70 kılo) aıryqsha senim arttyq. Ekeýiniń de qarsylastary asa qarýly emes edi. Dına rýmynııalyq Lakramıoara Perıshochtiń «jeteginde» ketti. Valentına mozambıktik Alsında Helena Pangýany jap-jaqsy sabap jatyp, qapııada nokdaýnǵa túsip qaldy. Sol nokdaýn básekeniń taǵdyryn sheshti. Sol sekildi Jaına Shekerbekova (52 kılo) men Karına Ibragımova (57 kılo) da keńinen kósile alǵan joq.

Jarys qorytyndysy boıynsha Túr­kııanyń – jeti, Qazaqstannyń – bes, Taıland pen Úndistannyń – úsh, О́zbek­stan, Brazılııa, Italııa, Irlandııa, Aljır, Kanada, Mozambık, Polshanyń – eki, Bolgarııa, Argentına, Ispanııa, Kolýmbııa, Rýmynııa, Taıpeı, Kosovo, AQSh, Panama, Fransııa, Aýstralııa, Lıtva, Marokko jáne Nıderlandtyń  bir boksshysy jartylaı fınalda kúsh synasty. Atalǵan jarysta jeńip alǵan júldelerdiń sany boıynsha jerlesterimiz ekinshi oryndy ıelendi. Árıne, bul – jaqsy nátıje. Alaıda bizdi alańdatyp otyrǵany – altynnyń joqtyǵy. Iаǵnı sapanyń tómendigi.