Joǵaryda atalǵan memorıaldyq mýzeıdiń dırektory Sahan Tólenovtiń aıtýynsha, kise belbeýdi Torǵaı óńirine tanymal usta Sádýaqas Kóbentaıuly jasaǵan. Jalpy, Áljan atamyz qııapatty, janary ótkir, susty adam bolǵan. Dúnıeden ozǵansha kise belbeýin belinen sheshpegen. Tipti ol kisiniń kise belbeýimen túsken fotosy urpaqtarynda saqtalǵan bolýy kerek.
Amangeldi aýdandyq gazetin uzaq jyldar basqarǵan qalamger Bógetbaı Álmaǵambetuly óziniń 2000 jyly jaryq kórgen «Torǵaıdaǵy azattyq kóterilisi» atty tarıhı ocherk-zertteýinde 1916 jyly Torǵaı óńirinde bolǵan kóterilistiń shyǵý sebebine toqtalyp, buryn jarııalana qoımaǵan tyń derekterdi keltirgen. Sonda Áljan Qarabaıuly basqarǵan jasaqtyń patshanyń jazalaýshy otıardyna tutqıyldan soqqy berip, birneshe toıtarys bergenin jazady. Sondaı-aq erjúrek myńbasynyń jasynan naızager, batyr bolǵanyn aıtady. «Áljan – naızager adam. Buryn qazaqtyń ózara qaqtyǵysynda kisi ólimine jol bermes úshin naızamen sannyń qoń etinen shanshyp, attan túsirý nemese arqadan uryp qulatý ádisi bolǵan. Áljekeń osyndaı qaqtyǵystarda naızagerligimen kózge túsken. Osyndaı bir qaqtyǵysta Biráliniń Sultanyn naızamen shanshyp túsirgen», deıdi.
Klassık jazýshy Ǵabıt Músirepov «Batyrdyń bıik tulǵasy» atty maqalasynda «Amangeldi Imanov týraly durys málimet berip, shyndyqty aıtqan Áljan Qarabaev» dep atap kórsetti. Qart jýrnalıst Bógetbaı aqsaqaldyń jazýynsha, Torǵaıdaǵy ult-azattyq kóterilisin bastaǵan Ábdiǵapar, Amangeldi, Keıki batyrlardyń dosy, serigi Áljan ádil adam bolǵan. Sonyń bir mysaly: Áljan qarııa biraz jyldar boıy jalǵyz uly Ábsadyqtyń joǵary zań oqý ornyn bitirse de, óz mamandyǵy boıynsha zań oryndarynda qyzmet isteýin qalamaǵan. Sondaǵysy «bireýdiń obalyna qalyp, qııanat jasap, qarǵysyn alasyń» deıdi eken.
