Álimhanulynyń apperkoty

Bul jekpe-jekte WBO nus­qasy boıynsha orta salmaqtaǵy «ýaqytsha» álem chempıony ata­ǵy sarapqa salyndy. Las-Ve­gasta qarsylas atanǵan boksshylar bir-birin burynnan jaqsy tanıtyn bolyp shyqty.  Osydan toǵyz jyl buryn, ıaǵnı 2013 jyly Qazaq eline Uly­brı­tanııa boksshylary ke­lip, biz­diń jigittermen birlesken oqý-jattyǵý jıynyn ótkizdi.

Sol kezde olar sparrıngke shyqqan eken. BAQ ókilderine bergen suhbatynda Dennı: «Iá, sol kezde Jánibekpen jolym túıiskeni ras. Biraq bul jattyǵý jıyny bolǵandyqtan, qumarymyz qanǵansha aıqasa almadyq. Tek bir-eki raýnd qana qolǵap túıistirýmen shekteldik. Odan beri talaı jyldyń júzi boldy. Ýaqyt oza ekeýimizdiń de sheberlik deńgeıimizdiń artqany anyq. Al meniń qanshalyqty óskenimdi aldaǵy jekpe-jekte anyq baıqaıtyn bolasyzdar», dep aqtaryla sóılegen edi. 

Barsha qazaqstandyq jankúıer taǵatsyzdana kútken bul jekpe-jek uzaqqa sozylmady. Báseke bastalǵan bette Jánibek qarsylasyn birden qyspaqqa aldy. Joıqyn soqqylaryn dál darytyp, oǵan esh bas kótertken joq. Birinshi raýndtyń ózinde nokdaýn belgilendi. Tóreshi onǵa deıin sanaǵansha Dıgným esin jıyp úlgerdi. Biraq qazaq boksshysy qarqynyn esh báseńdetpedi. Únemi shabýyl ótinde júrgen Álimhanuly ekinshi raýndtyń sońǵy mınýtynda brıtanııalyqty kerme arqanǵa tirep qoıyp, ońdyrmaı sabady. Úsh-tórt aýyr soqqy dál tıgennen soń Dennıdiń qorǵanýǵa da shamasy kelmedi. Sońynda Jánibek sol qolymen ıektiń astynan ońdyrmaı urdy. Osy apperkottan keıin qarsylasy esinen tanyp, edenge ońbaı qulady. Nokaýt! 

Iá, bul keshte bári qazaqsha boldy. «Dennıdi uryp jyǵamyn» degen Jánibek sózinde turdy. «Búgingi keshte «Qazaq stıliniń» qudiretin  kúlli álemge pash etemin» degen qandasymyz josparyn oıdaǵydaı júzege asyryp, kózdegen maqsatyna qol jetkizdi. «Ýaqytsha» álem chempıony ataǵy úshin jekpe-jektiń alty mınýtqa jetpeı aıaqtalýy joǵaryda aıtylǵan sózimizdiń aıqyn dáleli. Ol az deseńizder, osy kezdesý qarsańynda da, kezdesýden keıin de aǵylshynsha qoıylǵan saýaldardyń barlyǵyna Álimhanuly tek óziniń ana tilinde ǵana jaýap berdi. Osy jaıttyń ózi batyldyq pen batyrlyqtan bólek, keıipkerimizdiń boıynda qazaqy rýh pen qazaqy namystyń da basym ekenin anyq ańǵartty. 

Osylaısha, 29 jastaǵy Jánibek Álimhanuly kásipqoı rıngtegi óziniń 12-shi jekpe-jegin ótkizdi. Sol báse­kelerdiń barlyǵynda jeńiske jetip, segiz qar­sylasyn nokaýtqa jiberdi. Endi barsha Alash jurty qandasymyzdyń «tolyqqandy» álem chempıony ataǵy úshin talasatyn sátin ta­ǵat­syzdana kútedi. Ol kúnge de az qaldy, aǵaıyn!