Atalǵan jarys Túrkııa quramasynyń jarqyn jeńisimen aıaqtaldy. Fınalǵa shyqqan Anadoly eliniń bes boksshysynyń barlyǵy da jeńiske jetip, altynnan alqa taqty. Ásirese, biz Tokıo Olımpıadasy men Ýlan-Ýdedegi álem chempıonatynyń jeńimpazy Býsenaz Sıýrmenelıdiń ónerine aıryqsha rıza boldyq. 66 kılo salmaqta judyryqtasqan ol aqtyq synda jasóspirimder arasyndaǵy álem chempıony, Panamerıka oıyndarynyń qola júldegeri kanadalyq Charlı Kavananyń tas-talqanyn shyǵardy. Tóreshi jekpe-jekti úshinshi raýndta toqtatty. Al Býse Chakyroǵly (50 kılo) kolýmbııalyq Loreno Valensııa Vıktorııany, Hatıke Akbas (52 kılo) rýmynııalyq Lakramıora Perııokty jáne Sennýr Demır (+81 kılo) marokkolyq Haıja Merdıdi jeńdi. Oǵan asa jeńil salmaqtaǵy Aıse Chagıryrdyń bas júldesin qosyńyz. Sondaı-aq túrik qyzdarynyń qorjynynda taǵy eki qola medal bar.
Bas júldeniń ekeýin oljalaǵan Irlandııa quramasy jalpy esepte ekinshi oryndy ıelendi. Bul rette Amı Sara Broadhýrst (63 kılo) pen Lıza Edel Oroýrkege (70 kılo) teń keler eshkim tabylmady. Aqtyq saıysta alǵashqysy aljırlyq Iman Helıften aılasyn asyrsa, ekinshisi mozambıktik Elena Pangýannan basym tústi. Sol sekildi úndistandyq Zaren Nıhat (52 kılo), taıpeılik Iý Tın Lın (57 kılo), amerıkalyq Rashıda Shakılla Ellıs (60 kılo), kanadalyq Tammara Sıbaýlt (75 kılo) jáne latvııalyq Gabrıele Stonkýte (81 kılo) osy jarysta aldaryna jan salmady.
Mine, atalǵan memleketterdiń bylǵary qolǵap sheberleri jerlesterimizdiń aldyn orady. Qazaqstan quramasy sapyndaǵy kúmis alǵan Alýa Balqybekovadan bólek, Jaına Shekerbekova (52 kılo), Dına Jolaman (54 kılo), Karına Ibragımova (57 kılo) jáne Valentına Halzova (70 kılo) qola medaldy qanaǵat tutty. Bıylǵy álem chempıonatynda barlyǵy 26 memlekettiń ókilderine júlde buıyrdy.
