Aımaqtar • 24 Mamyr, 2022

«Jas daryn» baıqaýy ótti

24 ret kórsetildi

Balalar jyly aıasynda uıymdastyrylǵan oblystyq baıqaýǵa dekoratıvti-qoldan­baly ónermen aınalysyp júrgen 11-17 jas aralyǵyndaǵy alpysqa jýyq oqýshy qatysty. Kórmege on saýsaǵynan óner tamǵan jas óskin daryndardyń qolynan shyqqan qolóner týyndylary qoıyldy.

Jas avtorlardyń tańdaǵan taqyrybyna, kórkemdik talǵamy men oı erkindigine, sýretkerlik sheberligine tańǵalmasqa bolmaıdy. Kúrdeli kompozısııaǵa qurylǵan keıbir dúnıeler tipti bala emes, quddy tájirıbeli kásibı sheber jasap shyqqandaı erekshe kóz tartady. Jastar shy­ǵarmashylyǵyndaǵy jańa­shyl­dyqty qazylar alqasynyń músheleri de atap ótip, daryndy balalardyń ishinde kelesheginen zor úmit kúttiretin sheberlerdiń az emes ekenin aıtty.

– Jas qolónershilerdiń shy­ǵarmashylyqqa qasań turǵyda emes, keń oılap, kreatıvti kóz­qaraspen jol salyp jatqany baıqalady. Keıbir balǵyndardyń jasaǵan dúnıesi bizdi de tánti etti. Bul baıqaýǵa qatysqan oqýshylardyń bári bolashaqta sý­retshi bolmaýy múmkin. Bir­aq kemeli tolysqan kásibı maman bolyp qalyptasary anyq. Jalpy, Memleket basshysy Qasym-Jomart Toqaevtyń 2022 jyldy balalar jyly dep jarııa­lap, qoǵamdy urpaq tárbıesine, balanyń qabilet-darynyn ush­taý, damytý, yntalandyrý máse­lelerine baǵyttaǵany óte qup­tarlyq bastama boldy, – dedi Qazaqstan sýretshiler odaǵynyń múshesi Aleksandr Zaharchenkov.

Baıqaýǵa shalǵaı aýyldardan kelgen bala sheberlerdiń de qolónerge degen talaby myqty. Mysaly, Amangeldi aýylyndaǵy jalpy bilim beretin mekteptiń 8-synyp oqýshysy Aısha Ábil­ǵazy «Qyz jasaýy» atty kompozısııasyn alyp kelipti.

– Amangeldidegi «Shuǵyla» balalar jáne jasóspirimder shyǵarmashylyq ortalyǵynyń shákirtimin. Ismerlikpen aınalysyp júrgenime 3 jyl boldy. Qolóner úıirmesine 25-30 shaqty qyz bala barmyz. Aldymen aýdandyq baıqaýǵa qatysyp, bas júldeni utyp aldym. Endi mine, oblystyq baıqaýdyń júldesinen de úmittimiz. «Jas darynǵa» 2019 jyly da kelip, ekinshi orynǵa ıe bolǵanmyn. Munda ákelgen kompozısııamyz qazaqtyń qyz uzatý rásiminde paıdalanylatyn 8 túrli turmystyq buıymnan turady. Ustazym Nursulý Meı­ram­bekqyzynyń kómegimen 5-6 aıdyń ishinde jasap shyqtym, – dedi jas daryn.

Aıshany konkýrsqa alyp kelgen «Shuǵyla» balalar jáne jasóspirimder shyǵarmashylyq ortalyǵynyń jetekshisi Erbol Qoıshybaevtyń aıtýynsha, Aman­geldi aýdanynda balalarǵa arnalǵan bes baǵytty qamtıtyn 36 úıirme jumys isteıdi eken.

– Oblystyq «Jas daryn» baıqaýy 8 nomınasııa boıynsha ótip jatyr. Sol 8 atalymǵa bir-birden segiz jumys ákelip otyrmyz. Aýdandyq kezeńde jeńip shyqqan eki shákirtimiz qatysyp jatyr. Máselen, birinshi nomınasııaǵa oıý-órnekpen áshekeılengen ult­tyq kıim úlgilerin alyp keldi. Muny da ózimizdiń tigin úıirmesine qatysatyn shákirtterimiz tikken. Aýylda ul balalarǵa qolónerden sabaq beretin Jasulan Nurbaev degen aǵamyz bar. Kórme-baıqaýǵa sol kisiniń shákirtteri kıizúıge uqsatyp jasaǵan bolashaqtaǵy za­manaýı mekteptiń maketin de ákep otyrmyz, – dedi ortalyq basshysy.

Baıqaýda sándik-qoldanbaly óner men kórkem-estetıkalyq baǵyttaǵy shyǵarmashylyq úıir­me­lerge qatysatyn balalar­dyń 104 jumysy kópshilik nazaryna usynyldy. Jas sheberlerdiń ulttyq oıý-órnekpen bezendiril­gen buıymdary kóbine toqyma, aǵash, ıttemir, súıek, teri, saz, saban qaǵazdan jasalǵan.

Balalar baıqaýy oblystyq bilim basqarmasyna qarasty psı­hologııalyq qoldaý jáne qosym­sha bilim berý óńirlik ortaly­ǵynyń muryndyq bolýymen ótti.

– Byltyr osy baıqaýdyń respýblıkalyq kezeńinde Beıim­bet Maılın, Jitiqara, Qostanaı aýdanynyń oqýshylary jeńimpaz atandy. Bıyl da myqtylar qa­tarynan kórinemiz dep oılaımyz. О́ıtkeni baıqaýdyń 7 atalymyna kompıýterlik dızaın degen taǵy bir nomınasııa qostyq. Sóıtip, segiz baǵyt boıynsha ju­mystar usynylyp otyr. О́ńirde kórkem-estetıkalyq baǵyttaǵy úıirmelerde 3,5 myńnan astam bala tálim alady. Bul baıqaý sol úıirmelerdiń jumys nátıjelerin qorytyndylaý maqsatynda uıym­­­dastyryldy, – deıdi óńir­­lik or­talyqtyń dırektory Elena Petrenko.

Baıqaý barysynda óńirge belgili qolóner sheberleri men kásibı sýretshiler arnaıy sheber­lik saǵattaryn ótkizdi. «Jas daryn» konkýrsynda daralanǵan jeńimpazdardyń shyǵarmalary aldaǵy 12-14 qazanda ótetin «Al­tyn qazyna» respýblıkalyq kór­mesine qoıylady.

 

Qostanaı oblysy

Sońǵy jańalyqtar

Dollar arzandady

Qarjy • Keshe

Uqsas jańalyqtar