Aımaqtar • 25 Mamyr, 2022

BQO-da azyq-túlik baǵasy qymbattady

Batys Qazaqstan oblysynda azyq-túlik taýarlarynyń baǵasy ósti, dep habarlaıdy Egemen.kz.

BQO kásipkerlik jáne ındýstrıaldyq-ınnovasııalyq damý basqarmasynyń basshysy Jumageldi Batyrnııazov óńirlik kommýnıkasııalar qyzmeti alańynda ótken brıfıngide málim etkendeı, jyl basynan beri kókónis jáne bakaleıa ónimderiniń baǵasy artqan.

Onyń aıtýynsha, áleýmettik mańyzy bar taýarlar baǵasy ósýiniń negizgi sebepteri basqa elderden ákelinetin negizgi shıkizat kóziniń, jem-shóp, tyńaıtqyshtyń qymbattaýyna baılanysty. Taýarlar logıstıkasy baǵasy da ósti. Atap aıtqanda, shıkizat – kúnbaǵys baǵasynyń ósýi sodan alynatyn kúnbaǵys maıynyń, jem-shóp pen tyńaıtqyshtyń qymbattaýy taýyq jumyrtqasy men etiniń baǵasy ósýine áser etti. Jemshóp baǵasy 25-35 paıyzǵa qymbattady, túrine qaraı 50-60 myń teńgeden 100-110 myń teńgege deıin jetti. Kókónis ónimderine baǵanyń ósýi maýsymdyq sıpatqa baılanysty.

«Sondaı-aq álemdegi geosaıası jaǵdaı aıtarlyqtaı áser etti, oblystyń geografııalyq ornalasýyna baılanysty ónimniń edáýir bóligi Reseı Federasııasynyń shekaralas aımaqtarynan ákelinedi jáne rýbl baǵamynyń ósýi de yqpalyn tıgizdi», dedi J.Batyrnııazov.

Basqarma basshysynyń sózine qaraǵanda, óńirde azyq-túlik baǵasyn turaqtandyrý boıynsha jumystar júrgizilýde. Mysaly, oblys halqyn qantpen qamtý maqsatynda tómen baǵamen 204 tonna qant jetkizilip, satyldy. «Azyq-túlik kelisimshart korporasııasy» UK» AQ-ǵa halyqtyń qajeti úshin qosymsha 1 800 tonna kóleminde qant bólý týraly hat joldandy.

«Sáýir aıynda kılosyna 450 teńge baǵamen 476 tonna qantty mamyr aıynda jetkizý úshin jeke kásipkerlerge aldyn ala tólem jasaldy. Onyń 30 paıyzy (142,8 tonna) óndirýshiler arasynda bólinedi. Otandyq qant óndirýshilermen tikeleı kelissóz júrgizilýde. Qant óndirýshilerdiń aqparatyna qaraǵanda, olar kúni búgin shıkizatpen qamtamasyz etilgen jáne aptasyna 140 tonna qantty óńirge úzdiksiz jiberýdi josparlap otyr. Iri saýda ortalyqtarynda qant tapshylyǵy men alypsatarlyqqa jol bermeý úshin onyń mólsherin shektep satý uıymdastyryldy. Baǵanyń negizsiz ósýine jol bermeý jáne turaqtandyrý maqsatynda monıtorıng júrgizilip, basqa da jumystar atqarylýda», dedi J.Batyrnııazov.

Aıana Toǵanbek

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz