Kitap jármeńkesi – mereke hám mańyzdy tabys kózi

Aýa raıynyń qolaısyz, kúnniń jaýyndy bolǵanyna qaramastan jaqsy bas­tamany qoldap, kitap merekesine ke­l­­­genderdiń qarasy qalyń boldy. Ki­tap jármeńkesiniń mereke ári mańyz­­dy bızneske aınalǵanyn kórme qonaq­tarynyń  súıikti avtorlarymen kezdesýge asyǵyp, kitabyn qoltańbamen satyp alyp jatqanyna qarap baǵamdaýǵa bolady. Kitap naryǵynyń jańalyqtarymen tanysýǵa kelgen Mádenıet jáne sport mınıstri Dáýren Abaev  pen Almaty qalasynyń ákimi Erbolat Dosaev saltanatty jıynda sóz sóılep, baspagerlermen tildesti.

– Bul jár­meńkege otandyq 55 ki­tap mekemesi men Reseı, О́zbekstan, Qyr­ǵyzstan sekildi kórshiles elderden baspagerler men arnaıy delegasııa qatysyp otyr. Mádenıet jáne sport mınıstrligi kitap isi salasyndaǵy oń bas­tamalardy árdaıym qoldap keledi. Atap aıtqanda, bıyl jańa «Qazaq ádebıeti» serııasymen jas qalamgerler men jańa esimderdiń shyǵarmalary arnaıy logotıppen basyp shyǵarylady. Oǵan qosa, «Balalar men jasóspirimder ádebıeti» serııasymen jalpy taralymy 72 000 danada balalar ádebıetin basyp shyǵaryp, memlekettik kitaphanalarǵa taratýdy kózdep otyrmyz. Mınıstrlik bıyl alǵash ret respýblıkalyq deńgeıde «Úzdik balalar shyǵarmasy», «Jyldyń úzdik kitaby», «Jas qalamger» jobalaryn júzege asyrýdy josparlap otyr. Atalǵan jobalar aıasynda balalar ádebıeti avtorlary men jas qalamgerlerdi qoldap, otandyq avtorlardyń komıksterin, balalarǵa arnalǵan ózekti ádebıetterdi basyp shyǵarý qarastyrylýda, – dedi D.Abaev saltanatty jıyndy ashý rásiminde sóılegen sózinde.

Sonymen qatar Memleket basshysy­nyń tapsyrmasyna sáıkes, mınıstrlik 2023 jyldan bastap jas qazaqstandyq jazýshylar men aqyndar úshin arnaıy Prezıdenttik ádebı syılyq taǵaıyn­daý týraly jobany ázirlep jat­qa­nyn súıinshiledi. Prezıdenttik syılyqty taǵaıyndaýda proza, poezııa, dramatýrgııa, balalar ádebıeti nomınasııala­ry engiziledi. Atalǵan syılyqty Qazaq­stannyń 19 ben 29 jas aralyǵyndaǵy azamattarǵa tabystaý qaras­ty­rylǵan. Mádenıet jáne sport mınıs­tri álem elderindegi mádenı is-shara­lar tájirıbesin negizge ala otyryp, osyn­daı aýqymdy kitap jármeńkesin uıym­dastyrýǵa erekshe qoldaý bildirgen Alma­ty qalasynyń ákimdigine alǵys aıtty.

Kitap pen qalamgerdiń nasıhaty úshin taptyrmas is-sharaǵa aınalǵan ki­tap jármeńkesinde ádebıet jáne óner qaıratkerlerimen kezdesýler, jańa kitap­tardyń tusaýkeser rásimderi jáne mańyzdy taqyryptar boıynsha maman­dardyń qatysýymen dóńgelek ústelder uıymdastyryldy. Qazaqstanda kitap mádenıetin damytýdy basty baǵdary etip otyrǵan Mádenıet mınıstrligi osyndaı jármeńkeni ár óńirde ótkizýge daıyn ekenin jetkizdi.

ALMATY