Bilim jáne ǵylym mınıstrligine qarasty Balalar quqyqtaryn qorǵaý komıtetine bir aıda 110 nysandaǵy keleńsizdikter týraly 1 myńnan asa habarlama túsken. Shaǵymdardyń basym bóligi mektepterdegi sanıtarlyq-gıgıenalyq jaǵdaılarǵa baılanysty boldy.
Atalǵan komıtet elimizdegi oqýshylarmen jáne ata-analarmen birlesip, mektep ájethanalary men ashanalaryndaǵy kemshilikterdi anyqtaý, mektepterdi jabdyqtaý jáne olardy ustaýǵa qarjy alatyn ákimdiktermen eskertýlerdi joıý maqsatynda «Balaǵa laıyq» aksııasyn bastaǵan.
Balalar quqyqtaryn qorǵaý komıtetiniń tóraǵasy Esenǵazy Imanǵalıev: «Aksııanyń birinshi kezeńi aıaqtaldy. Jumysty belsendi júrgizý úshin barlyq oblystyń bilim basqarmalarymen, balalar ókildikterimen onlaın kezdesýler ótkizildi. Bilim berý uıymdarynda messendjerlerdiń QR-kodtary bar býkletter taratylǵan», dedi.
E.Imanǵalıevtiń málimdeýinshe, bilim ordalarynyń sanıtarlyq-turmystyq jaǵdaıy men ashanalarynyń jaı-kúıine qatysty barlyq shaǵym ákimdikterge jiberiledi. Aksııa kezinde anyqtalǵan kemshilikter men eskertýlerdi joıýǵa 1 qyrkúıekke deıin ýaqyt bergen. Nátıjesinde Instagram-daǵy @balaga.laiyq paraqshasynda mektep ájethanalary men ashanalarynyń «deıingi jáne keıingi» foto-vıdeolary jarııalanady.
Aksııanyń ekinshi kezeńi jańa oqý jylynda bastalady. Bir aı buryn bastalǵan aksııa «Mekteptiń jaqsarýyna kómektes!» uranymen ótip jatyr. Monıtorıng jazalaý úshin emes, balalarǵa sanıtarlyq-gıgıenalyq jaǵdaılar jasalmaǵan bilim berý uıymdaryn anyqtaýǵa baǵyttalǵan. Bul rette mektep ashanalarynda problemaly jýynatyn bólmeler, zań buzýshylyqtar jaıly habar bergenderdiń aty-jóni, olar týraly aqparattardyń jarııalanbaıtynyna kepildik beriledi.
Osyǵan deıin mınıstrlik birqatar oblystyń ákimdikterine aýladaǵy dárethanalardy joıý jáne mektepterde balalardy qorǵaý úshin dabyl túımelerimen, beınekameralarmen jáne basqa da qaýipsizdik júıelerimen jumys júrgizbegen laýazymdy tulǵalardy jaýapqa tartý týraly hat joldaǵan edi.
Baljan NURǴALIQYZY,
L.N.Gýmılev atyndaǵy Eýrazııa ulttyq ýnıversıtetiniń
2-kýrs stýdenti
