Iá, qazirgideı bilim men ǵylymnyń zamanynda árip tanymaıtyn jandy jolyqtyrý qıyn-aq. Degenmen qoǵamda qyzý talqylanatyn tártipsizdikter álemniń ekinshi ustazy Ál-Farabı aıtqan «Tárbıesiz berilgen bilim – adamzattyń qas jaýy» deıtin qanatty sózdiń áli de ózektiligi joıylmaǵanyn kórsetedi. Osy oraıda «Oqý oshaqtary bilimdi qandaı tárbıege negizdeıdi?», degen saýal týady.
Elordadaǵy «Qarlyǵash» balabaqshasynyń dırektory Beıbitgúl Zeınádilqyzy mektepke deıingi uıymdarǵa arnalǵan standart pen oqý baǵdarlamasynyń talaptaryna saı jumys istep otyrǵan tárbıe men bilimniń uıasy balalarǵa ulttyq qundylyqtardy sińire alatynyn aıtady.
«Elimizdegi barlyq balabaqshaǵa ortaq Mektepke deıingi tárbıe men oqytýdyń memlekettik jalpyǵa mindetti standarty jáne osyǵan negizdelgen úlgilik oqý baǵdarlamasy bar. Endi osy baǵdarlamanyń maqsatynda balalardyń jas jáne jeke múmkindikterine sáıkes bilim, bilik jáne daǵdylardy, rýhanı-adamgershilik qundylyqtardy qalyptastyrý, ulttyq salt-dástúrlerge jáne jalpy adamzattyq qundylyqtarǵa negizdelgen patrıotızm men toleranttylyqqa tárbıeleýdiń kózdeletini anyq kórsetilgen. Demek jas urpaqtyń boıyna balabaqshadan bastap rýhanı-adamgershilik qundylyqtardy sińirip, ulttyq salt-dástúrge negizdelgen otansúıgishtik sezimin oıatý baǵytynda tárbıe men bilim berilýi qajet. Buǵan mektepke deıingi tárbıe men oqytý isinde memlekettik qujattyń ózi baǵyt berip tur», deıdi B.Zeınádilqyzy.
Balabaqsha basshysynyń aıtýynsha, atalǵan uıym tárbıelenýshileriniń ózge elderdegi qatarlastarynan bilim-bilik, daǵdysymen qalys qalmaý úshin halyqaralyq tájirıbeni, sheteldik oqytý tehnologııalaryn zerdeleıdi, degenmen óz oqý-tárbıe úderisine engizýde ulttyq tárbıege yńǵaılaıdy. Sonymen qatar salt-dástúrlerge negizdelgen tárbıe men bilim jyl boıyna júrgiziledi.
«Ulttyq qundylyqtarǵa, salt-dástúrge negizdelgen tárbıe men bilim jospardaǵy sabaqtardyń, qosymsha tanymdyq-shyǵarmashylyq jumystardyń barlyǵyn qamtıdy. Máselen, balabaqshamyzda Naýryz merekesi bir aı boıy toılandy. «Naýryz – izgiliktiń bastaýy» atty bir aılyq merekede tárbıelenýshiler ata-analarymen birge «Atqa mingizý, «Búrkit qondyrýǵa» kýá bolyp, ulttyq oıyndardy ózderi oınap, aǵash egip, Qydyratadan bata aldy. Osy arqyly oıyn-saýyqqa emes, balalarǵa ata-babamyzdyń salt-dástúr, tanym-túsiniginen tárbıe men bilim berýge tyrystyq. Bir kúndik is-sharadan balanyń oıynda kóp nárse saqtalmaýy múmkin. Al birneshe kúnge, tipti aptalarǵa sozylǵan saltanatty sátten oıyna toqyp qalatyny anyq. Taǵy bir mysal, Memlekettik rámizder kúnine arnalǵan tárbıelik, tanymdyq baǵyttaǵy jumystar da bir kúnniń sharýasy emes. Bul taqyryptyq sabaqtardan bastap tanymdyq, mýzykalyq, tárbıelik jumystarǵa deıin barlyq topty, árbir sabaqty qamtıdy», deıdi «Qarlyǵash» balabaqshasynyń dırektory.
Kúni keshe Bilim jáne ǵylym mınıstri Ashat Aımaǵambetov mektepke deıingi uıymdarǵa qoıylatyn talaptardyń kúsheıtiletinin habarlady. Oǵan balabaqshalardaǵy beıbereketsizdik pen mektepke deıingi bilim berý uıymdarynyń 80 paıyzy, ıaǵnı basym bóliginiń memlekettik attestattaýdan óte almaǵany sebep bolǵan. Biz 3-6 jastaǵy balalardy balabaqshamen 100 paıyzǵa qamtydyq dep qýandyq. Sóıtsek, nátıje basqasha. Bul sannan sapaǵa kóshetin kezdiń kelgenin kórsetedi.
