– Biz eńbek ujymdarymen, medısına, mádenıet qyzmetkerlerimen jáne pedagogtermen kezdesý ótkizdik. Maqsatymyz – Konstıtýsııaǵa engiziletin ózgerister men tolyqtyrýlardy túsindirý. Aldaǵy konstıtýsııalyq reforma bılik tarmaqtary arasyndaǵy qarym-qatynas teńgerimin ońtaılandyrady. Halyqtyń eldi basqarýǵa qatysýyn keńeıtedi, azamattardyń konstıtýsııalyq quqyqtaryn qorǵaýdy kúsheıtedi. Bizdiń árqaısymyz osy múmkindikti paıdalanýymyz kerek, – dedi Ǵalymjan Eleýov.
Amanǵalı Berdalınniń pikirinshe, osyndaı kezdesýlerden Prezıdenttiń saıasaty men reformalaryna halyqtyń qoldaýy aıqyn kórinedi. Bul – memlekettiń ádiletti Qazaqstan qurýdaǵy baǵytynyń durystyǵynyń jarqyn kórinisi.
– Konstıtýsııaǵa engiziletin ózgeristiń ishinde elimizdiń sýperprezıdenttik basqarýdan túbegeıli bas tartyp, Prezıdenttik Respýblıka modeline ótýi, barlyq partııaǵa teń múmkindik ashylýy, demokratııalyq qoǵamnyń kúsheıýi eldi jańa kezeńge ótýiniń kepili dep bilemin. Barlyq aqtóbelikti saıası naýqanǵa atsalysyp, daýys berýge shaqyramyn, – dedi Amanǵalı Berdalın.
«Qazaqtelekom» AQ Aqtóbe oblystyq fılıalynda qazirgi tańda 465 adam jumys isteıdi. Úlken eńbek ujymy memleket basshysy Qasym-Jomart Toqaevtyń reformalaryn qoldaıtynyn aıtyp, saıası naýqannan úlken úmit kútetinin jetkizdi.
– Elin, jerin, balalarynyń bolashaǵyn oılaıtyn adam referendýmǵa barýy kerek dep oılaımyn, – dedi jergilikti kásipodaq uıymynyń jetekshisi Ǵalııa О́tegenova.
