Sondyqtan robottehnıkany jetik meńgergen shákirtter oqıtyn bilim ordasynyń ustazdary saıası mańyzy joǵary erekshe kúnge erekshe sıpat bergisi kelgen syńaıly. Referendým ýchaskesine kelgen eresekter de, ata-anasyna ere kelgen balalar da robotpen birge fotosýretke túsip, shat-shadyman kúıge bólendi.
– Turǵyndardyń kóbi búkil otbasymen birge keledi. Ártúrli jastaǵy kelimdi-ketimdi adamdardyń bári ózderin qarsy alǵan robotty kórip, kóńilderi kóterilip, qýanysyp ketip jatyr. Keıbir turǵyndar daýys berý tártibin suraıdy. Ondaı adamdardyń saýalyna aldyn ala engizilip qoıǵan baǵdarlama boıynsha «temir qyzmetkerimiz» jaýap beredi, – deıdi ýchaskelik referendým komıssııasynyń tóraǵasy Ramazan Raıysov.
Atalmysh ýchaskege tizim boıynsha 2 051 turǵyn tirkelipti. Saǵat 18.00-ge taman eki myńǵa jýyq adam daýys beripti.
– Kúni boıy jeke sharýama aldanyp júrip qaldym. Áıtse de, kókeıimde daýys berýge úlgermeı qalyp júrmeıin degen oı turdy. Mine, ózderińiz kórip tursyzdar ǵoı, úlgerip keldim. Ár azamat Ata Zańymyzǵa enetin ózgerister týraly óz ustanymyn bildirýi paryz. О́z basym bul ózgeris memleketimizdiń qurylymyn jetildiredi degen úmitpen keldim. Búgingi qoǵam elimizdi jarqyn bolashaqqa bastaıtyn ózgerister bolǵanyn qalaıdy jáne solaı bolady dep senedi, – deıdi daýys berýge keshigińkirep kelgen Qostanaı qalasynyń turǵyny Musa Mamedov.
Qostanaı oblysy
